Presidenti rus nuk dha detaje – Ai pretendoi se një ‘rend botëror më i drejtë’ është në proces të formimit.
Presidenti rus Vladimir Putin tha sot se Perëndimi është i gatshëm të shkaktojë “revolucione me ngjyra” dhe “banjo gjaku” në çdo vend, pa përmendur asnjë në veçanti, shkruan protothema, transmeton Fol Drejt.
Putin nuk ka ofruar asnjë provë për të mbështetur këtë pretendim. Deklarata e tij u bë në fjalimin e tij, nëpërmjet video-telefonit, drejtuar krerëve të shërbimeve të sigurisë të Komonuelthit të Shteteve të Pavarura , ku përfshihen ish-republikat sovjetike.
“Ne e dimë se Perëndimi po përgatit skenarë për të nxitur konflikte të reja në zonën e CIS. Por ne tashmë kemi mjaft”.
Presidenti rus vlerësoi gjithashtu se konfliktet në vendet e ish-BRSS, dhe veçanërisht midis Rusisë dhe Ukrainës, janë “sigurisht” rezultat i rënies së Bashkimit Sovjetik .
“Mjafton të shohim se çfarë po ndodh në këtë moment midis Rusisë dhe Ukrainës , çfarë po ndodh në kufijtë e disa vendeve të CIS. E gjithë kjo, natyrisht, është rezultat i rënies së Bashkimit Sovjetik”, argumentoi ai.
Putin tha se një “rend botëror më i drejtë” ishte në proces të formimit “përmes një procesi të vështirë”. “Një hegjemoni unipolare po shembet në mënyrë të pashmangshme, është një realitet objektiv që Perëndimi kategorikisht refuzon ta pranojë. Dhe ne po shohim se çfarë vjen nga kjo, “vazhdoi ai. “I kapur pas së kaluarës dhe duke u përpjekur të imponojë një politikë diktimi në të gjitha fushat, nga marrëdhëniet ndërkombëtare te ekonomia, kultura dhe sportet, ky kolektiv i famshëm Perëndim krijon probleme të reja dhe kriza të reja”, argumentoi gjithashtu presidenti rus.
Në të kaluarën, Putin e ka quajtur rënien e BRSS “fatkeqësia më e madhe gjeopolitike” e shekullit të 20-të./FolDrejt/
