“Vizita më e gjatë ndonjëherë, e ndonjë kryeministri në Shtetet e Bashkuara të Amerikës (ShBA)”, ka hyrë në ditën e 14-të të saj, pa ndonjë lajm të madh, pa ndonjë takim të rangut të lartë, e aq më tepër, pa ndonjë marrëveshje të madhe, shkruan Fol Drejt.
Kështu të paktën e kanë përshkruar opozitarët në Kosovë, duke e cilësuar vizitën e tij madje si një “ekskursion”.
““Ju jeni qe një kohë të gjatë gazetarë të gjithë mbani në mend keni parë kryeministra edhe më hershëm edhe president të Kosovës që kanë qenë në SHBA, por asnjë prej tyre nuk ka qenë në ekskursion siç ka qenë kryeministri Kurti kjo vizitë nuk ka qenë vizitë zyrtare ka qenë më shumë e karakterit privat” – tha sot Kryetari i Partisë Demokratike të Kosovës (PDK), Memli Krasniqi në një konferencë para gazetarëve.
Për itinerarin e udhëtimit të tij në ShBA, ka rrëfyer vetë Kurti në “reportazhet” zyrtare që i ka publikuar Zyra e Kryeministrit:
“Një javë më parë fillova këtë vizitë të planifikuar prej kohësh në Shtetet e Bashkuara. U ndala në Uashington DC për një takim me Millennium Challenge Corporation (MCC), vazhdova drejt perëndimit për në Kaliforni, dhe tani po kthehemi përsëri, në një imitim të ndonjë udhëtimi të madh rrugor amerikan. Deri më tani kemi qenë në San Francisko, Dallas, Des Moines dhe do të kemi disa vizita të tjera në Detroit, Uashington, Boston dhe Nju Jork, duke e bërë këtë vizitën më të gjatë që një kryeministër i Kosovës ka bërë ndonjëherë në Shtetet e Bashkuara”, u tha para disa ditësh ai studentëve të Katedrës së Albanologjisë në Universitetin DePaul të Çikagos.
Mbështetur në faqen e njohur Booking.com e cila ofron mundësi shfletimi të të dhënave të të gjitha hoteleve në botë, me kusht që kryeministri të ishte vetë i dyti në këtë udhëtim, dhe po ashtu, me kusht që të qëndronte vetëm në një shtet për 13 net, fjala vjen në Uashington DC, kostoja e shpenzimeve do ta kapte shifrën: 1157 euro, + taksat dhe tarifat, deri në 3374 eoro, + taksat.
Natyrisht, shpenzimet e kryeministrit dhe ekipit që e ka shoqëruar, nuk janë bërë transparente deri më tani. Për më tepër, Kryeministri Kurti nuk ka udhëtuar i vetëm dhe, veç kësaj, ai nuk ka qëndruar vetëm në një shtet. Ai, siç ka treguar edhe vetë, ka shëtitur nga një shtet në tjetrin, duke bërë përpjekje që t’i vizitojë qendrat më të mëdha dhe për t’i takuar njerëzit më me ndikim në fushën e biznesit nga komuniteti shqiptar atje. Në anën tjetër, zyrtarët më të lartë politikë me të cilët është takuar, janë të rangut të këshilltarëve për siguri kombëtare, senatorëve dhe kongresistëve.
Ende nuk dihet nëse në agjendën e kryeministrit ka ndonjë takim tjetër, më të rëndësishëm, mirëpo vizita e tij duket se do të zgjat edhe ca ditë. Fol Drejt e ka kontaktuar zëdhënësin Përparim Kryeziu dhe është në pritje të përgjigjeve rreth pyetjeve që kanë të bëjnë me detajet e kësaj vizite./FolDrejt/
