Në ndejën e organizuar për fundvit nga qendra e Lëvizjes Vetëvendosje në Lipjan, festimet janë bërë edhe me produkte që janë prodhime serbe, shkruan Fol Drejt.
Në muajin sensibilizues kur po bëhet thirrje për bojkotimin e produkteve dhe prodhimeve serbe, qendra e LVV-së në Lipjan ka festuar me prodhime serbe siç është pija “Schweppes” që është produkt serb dhe prodhohet në Serbi.
Në organizim pjesëmarrës të mbajtur në lokalin “Rozafa”, e pranishme ishte Ministrja e Drejtësisë, Albulena Haxhiu, kryetari i qendrës në Lipjan dhe njëherish deputeti i parlamentit të Republikës së Kosovës, Adnan Rrustemi, si dhe kryetari i Komunës së Shtimes, Qemajl Aliu. Në organizim kishte edhe figura të tjera nga radhët e LVV-së dhe qytetarë. Edhe burime të afërta për Fol Drejt bëjnë me dije se disa nga produktet ishin prodhime serbe.
Ditë më parë vetë qendra e LVV-së në Lipjan kishte bërë thirrje që të bojkotohen produktet serbe duke shpërndarë njoftime lajmëruese për qytetarër e Lipjanit, mirëpo këtë standard nuk e kanë praktikuar në organizimin e tyre partiak.
Kujtojmë që këtë muaj shumë qendra të Lëvizjes Vetëvendosje anembanë Kosovës si dhe personalitete nga fusha të ndryshme janë duke bërë thirrje që të bojkohen produktet që janë prodhim serb./FolDrejt/