Në seancën e sotme parlamentare, në deklarimet jashtë rendit të ditës, deputetët e Kuvendit të Kosovës kanë vazhduar me pyetje parlamentare në adresë të zyrtarëve qeveritar. Ndër ta, deputeti i Partisë Demokratike të Kosovës (PDK), Elmi Reçica, ka adresuar një pyetje në drejtim të Ministres së Industrisë, Ndërmarrësisë dhe Tregtisë – Rozeta Hajdari për rezervat shtetërore, shkruan Fol Drejt.
“Çështja ka të bëjë me rezervat shtetërore të mallrave: A janë përfillur procedurat ligjore dhe a është dëmtuar buxheti i Republikës së Kosovës përgjatë kontraktimit apo blerjes së rezervave shtetërore të mallrave nga ana e Ministrisë së Industrisë, Ndërmarrësisë dhe Tregtisë?” – ka pyetur Reçica.
Ai ia ka kujtuar ministres paraprakisht se “çështja e rezervave shtetërore të mallrave është sensitive dhe me peshë, si e tillë duhet të trajtohet edhe nga Qeveria e Republikës së Kosovës, me seriozitet dhe përgjegjësi të lartë. Paralel me këtë është e rëndësishme të respektohen dispozitat juridikopozitive në lidhje me kontraktimin apo blerjen e tyre…” –
Nga ana e saj ministrja Hajdari e ka konfirmuar se:
“Janë përfillur të gjitha procedurat ligjore dhe me kompetencë të plotë ju them se nuk është dëmtuar buxheti i Republikës së Kosovës.”
Megjithatë Reçica nuk është kënaqur me këtë pyetje pasi ai e ka specifikuar se për çfarë rasti interesohej:
“Unë e kam këtu një fakturë, të datës 9 mars 2022, një fakturë të një ndërmarrjeje turke prej së cilës ju si ministri keni blerë grurë me çmim më të lartë se sa çmimi i tregut. Në kohën kur është bërë kjo blerje prej 10 tonësh, mars 2022 të vitit të kaluar, në bursën ndërkombëtare çmimi i grurit ka qenë vetëm 38 cent për kilogram, ndërsa ju në at kohë ju e keni paguar për 48 cent për kilogram. Çka do të thotë kjo për juve si ministri dhe juve personalisht si ministre, që 10 cent e keni paguar më shtrenjtë për kilogram dhe e keni dëmtu buxhetin e shtetit për 1 milionë euro në bazë të kësaj fakture?”
Megjithatë sipas deputetes nuk ka pasur ofertues për grurin ndërsa në përshpejtimin e vendimit kishte ndikuar edhe lufta e Ukrainës dhe mbylljes së kufijve.
Por deputeti Reçica ia ka kujtuar se kompaninë të cilën e ka kontraktuar ministria për blerjen e grurit, nuk e njeh as Shoqata e Mullisëve të Kosovës.
“Këtu po shihet se ka keqpërdorim ministre” – ka thënë Reçica, duke ia ka kujtuar se për këtë shkak ata si grup parlamentar kanë kërkuar shkarkimin e saj./FolDrejt/
