13 marrëveshje të reja ndërmjet Republikës së Kosovës dhe asaj të Shqipërisë kanë mbetur peng i një akti anulimi. Edi Rama nëpërmjet një konference të jashtëzakonshme të mbajtur dje në mbrëmje, tregoi që kabineti i tij nuk do të merrte pjesë ashtu siç ishte paraparë, në mbledhjen e përbashkët të dy qeverive në Gjakovë, shkruan Fol Drejt.
Nga Qeveria e Kosovës u tha se për këtë punë, dikasteret në të cilat pritej të nënshkruheshin marrëveshjet, kishin punuar gjatë:
“Mbledhjet e përbashkëta janë ndërmarrje të madhe organizative, të cilave u paraprinë një punë e madhe e ministrive për të përgatitur atë ditë. Nesër do të duhej të nënshkruheshin 13 marrëveshje të reja. Ato kishin synim t’i afronin ekonomitë tona, sistemet tona të drejtësisë, arsimit, kulturës, etj. Janë qytetarët ata që do humbasin më së shumti” – tha dje Përparim Kryeziu, zëdhënës i qeverisë, duke shtuar se për fat të keq, “anulimi i mbledhjes nga ana e kryeministrit Rama anuloi mundësinë për t’i nënshkruar ato.”
Sipas Qeverisë së Kosovës, është hera e parë që një mbledhje e tillë të anulohet njëanshëm.
Nga ana tjetër, nga arsyetimi i Kryeministrit Edi Rama kishte të bënte me raportet e Kosovës me bashkësinë euroatlantike:
“Në kushtet e përkeqësimit të marrëdhënieve të Kosovës me krejt bashkësinë euroatlantike, ky takim nuk mund të mbahet në formatin e parashikuar. I kam kërkuar Albinit që të takohemi në Gjakovë në një format më të ngushtë, përkatësisht me ministrat e mbrojtjes dhe të jashtëm”, e që sipas tij, nuk është pranuar.
Përkeqësimi i raporteve të Prishtinës zyrtare me aleatët perëndimorë, sipas Ramës, nuk ishte i mundur:
“Për fat të keq edhe me shumë keqardhje më duhet të them se nuk kemi pasur dakordësi me Kurtin për një ndryshim të formatit dhe ka kërkuar që mbledhja të bëhet normalisht dhe pastaj veç të diskutojmë për këtë por kjo nuk është e mundur sepse nuk është një moment për të krijuar një pasqyrë të rreme të asaj që ndodh me realitetin e Kosovës sot.”
Përpara konferencës për media të Kryeministrit Rama, në Kosovë ishin të bindur se mbledhja do të mbahej. Kjo bindje reflekton edhe në deklaratën e Kryeministrit të Kosovës, i cili gjatë ditës së djeshme tha ishte planifikuar që “për herë të dytë si nikoqir, e për herë të tretë në më pak se 2 vjet”, të mbahej kjo mbledhje.
Rama, në anën tjetër, theksoi se përkeqësimi i situatës në veri të Kosovës, qëndrimi i mbajtur nga ana e qeverisë sonë dhe për rrjedhojë, përkeqësimi i raporteve me aleatët ndërkombëtarë, e ka shtyrë drejt këtij vendimi./FolDrejt/
