Sipas një raporti të ri nga një grup i të drejtave të njeriut, më shumë se 600 tajvanezë të arrestuar jashtë shtetit janë ekstraduar në Kinë gjatë viteve të fundit. Organizata joqeveritare në mbrojtje të të drejtave të njeriut, Safeguard Defenders, ka deklaruar se praktika po “përdorej si një mjet për të minuar sovranitetin e Tajvanit”, shkruan BBC.
Tajvani, i cili e konsideron veten një komb të pavarur, ka këmbëngulur prej kohësh që tajvanezët e arrestuar jashtë vendit duhet të kthehen në ishull. Pekini e cilëson Tajvanin si një provincë të shkëputur që është pjesë e Kinës. Safeguard Defenders tha se dëbimet, midis 2016 dhe 2019, po “përdoreshin për të forcuar ndikimin e Pekinit jashtë vendit” , duke akuzuar Kinën për “gjueti” të tajvanezëve.
Në përgjigje të raportit të fundit, qeveria e Tajvanit tha se Kina “nuk ka juridiksion” mbi tajvanezët e arrestuar ose të dënuar jashtë vendit dhe se Pekini synon “të tregojë sovranitetin e tij mbi Tajvanin”.
“Ne i bëjmë thirrje palës kineze që lufta kundër krimit nuk duhet të përfshijë politikën dhe shpresojmë se njësitë e zbatimit të ligjit nga të dyja palët të vazhdojnë të bashkëpunojnë mbi bazën ekzistuese për të luftuar në mënyrë efektive krimet dhe për të protestuar për mirëqenien publike,” tha ai.
Kina ende nuk ka reaguar. Sipas politikës “Një Kinë”, Pekini ka këmbëngulur që çdo vend që dëshiron marrëdhënie diplomatike me Kinën, fillimisht duhet të prishë lidhjet zyrtare me Tajvanin.
Kjo ka rezultuar në izolimin diplomatik të Tajvanit nga komuniteti ndërkombëtar./abcnews
