Komuna e Prishtinës është raportuar se ka rritur faturën e tatimit në pronë. Në rrjete sociale kanë shpërthyer kritikat për këtë veprim, të cilin disa e kanë cilësuar si “tinëzar” nga ana e Ministrisë së Financave, shkruan Fol Drejt.
Faqja “Vrojtuesit e Lagjes” e kanë ngritur shqetësimin ndër të parët, “Qytetarët e Prishtinës po raportojnë 75% – 100% ngritje të tatimit në pronë. Çfarë po ndodhë Komuna e Prishtinës?”, – kanë pyetur ata.
Të menjëhershme kanë qenë reagimet nga ana e komunës, duke i përfshirë edhe disa asamblistë të partive opozitare.
“Përshëndetje, Komuna e Prishtinës nuk ka bërë rritje të normave tatimore, pra normat tatimore kanë mbet të njëjta. Ajo çfarë ka ndryshuar është vlerësimi i pronave të Komunës se Prishtinës, vlerësim ky që bëhet nga Ministria e Financave, vlerat e pronave në këtë raport janë paraqitur shumë të larta krahasuar me vitin e kaluar dhe rrjedhimisht kanë rezultuar me rritje të tatimit në pronë. Grupi i LDK në asamble kemi kërku rivlerësim nga Ministria e Financave” – ka shkruar Donjeta Dragusha nga Lidhja Demokratike e Kosovës (LDK).
Qytetarë të tjerë kanë shprehur pakënaqësitë e tyre, duke e kritikuar ministrinë dhe duke thënë se ky veprim është tërësisht i paarsyeshëm, meqë vjen në një kohë krize ekonomike.
“Jo 70%, 5 vitet e fundit kam pagu 119 euro. Në e-Kosova këtë vitë kam 264 euro!!! Lehtë të llogaritet. Tash komuna nga ky vitë vlerëson 1300 euro m2, e kam ndërmend me iu ba ofertë për 1000 euro m2 po ja shes komunës. Kaos në trafik, lojë me tru të qytetarve, vjedhje masive në këtë krizë, personalisht kam pagu me rregull por këtë vit skan me pa pagesë komuna. Me qenë qytetarë të organizuar nuk luajnë me ne kështu”, ka thënë qytetari Luan Reka.
Ekonomisti Ujkan Bajra, në një reagim në llogarinë e tij në Facebook, ka thënë se ka rritje enorme të bazës tatimore, ku për vitin 2023 është rritur gati 100% më shumë se dy vitet e mëparshme.
“Fatura e tatimit në pronë për vitin 2023 është gjeneruar/krijuar nga Ministria e Financave. Për të njëjtat njësi banimi apo truall/pllace, shoh një rritje anormale të bazës tatimore (vlera e vlerësuar e pronës), ku për vitin 2023 është rritur gati 100% më shumë se dy vitet e mëparshme dhe e gjithë kjo pa asnjë njoftim nga institucionet tona, por në një mënyrë shumë tinëzare (në rastin tim: shiko e njëjta pronë nga 76 mijë në 2021 vlerësohet 144 mijë në 2023-100% më shumë). Absurditeti i llojit të vet”, ka shkruar ai.
Tutje Bajra ka publikuar edhe disa të dhëna tatimore për tri vitet e fundit:
2023 – tatimi në pronë 571 euro
2022 – tatimi në pronë 350 euro
2021 – tatimi në pronë 304 euro
Sipas Bajrajt, kjo është taksa më e pamëshirshme në historinë e Kosovës:
“Me të njëjtën mirëqenie, me të njëjtat paga, me kufirin e rritur të varfërisë, me normën më të lartë të inflacionit në të gjithë periudhën e pasluftës, është absolutisht anormale që qytetarët të rëndohen edhe më shumë nga rritja e bazës tatimore (vlera e vlerësuar e pronës), rrjedhimisht e tatimit në pronë. E tmerrshme”, shkroi Bajra.
Fol Drejt ka kontaktuar Ministrinë e Financave për të kuptuar nëse kjo “fryrje faturash” ka ndodhur edhe për komunat e tjera, por ende nuk ka marr përgjigje.
Ndërkaq sot, Komuna e Prishtinës nëpërmjet një njoftimi ka bërë të ditur se “faji” është i Ministrisë së Financave:
“Të nderuar qytetarë të kryeqytetit,
Gjatë ditëve të fundit kemi pranuar shumë reagime rreth ngritjes së çmimeve të tatimit në pronë, e cila i është atribuuar Komunës së Prishtinës.
E kuptojmë plotësisht shqetësimin tuaj, por me qëllim të informimit të drejtë të qytetarëve rreth këtij procesi, ju informojmë se:
Bazuar në dispozitat e Ligjit në fuqi për Tatimin në Pronën e Paluajtshme
“Autoriteti kompetent për zbatimin e procedurës së vlerësimit është Ministria e Financave e cila përcakton zonat e vlerave, nivelet e vlerave dhe vlerën e vlerësuar të pronave të paluajtshme që janë brenda territorit të komunave. Vlerësimi i pronave të paluajtshme kryhet në përputhje me rregullat dhe procedurat e parashikuara në këtë Ligj dhe në aktin nënligjor që nxjerr Ministria e Financave për kategoritë e vlerave, metodat dhe modelet e vlerësimit”.
Komuna e Prishtinës, nuk e ka bërë përcaktimin e shumave në faturat e qytetarëve për vitin tatimor 2023.”/FolDrejt/
