Qeveria shqiptare i doli në krah sot Kosovës, duke dënuar sjelljen e grupeve serbe në veri të vendit.
Edi Rama mori në mbrojtje Albin Kurtin, duke thënë se marrëveshja duhet zbatuar dhe Kosova është në të drejtën e saj.
“Përshkallëzim i paarsyeshëm. Kosova në të drejtën e sovranitetit territorial. Administrim i pavarur i shtetit. I mbështes 100 %”, tha Rama.
Kryeministri shqiptar përshëndeti shtyrjen e vendosjes së reciprocitetit me 30 ditë, duke përgëzuar Albin Kurtin për vetëpërmbajtjen. Rama i drejtoi këtë mesazh të drejtpërdrejtë mikut të tij Vuçiq.
“I bëj thirrje Vucic të mos ushqejë me alibi grupet në veri që të kundërvihen”, u shpreh Rama.
Deklaratat Rama i bëri gjatë konferencës për shtyp me homologun spanjoll, i cili ishte në Tiranë, si pjesë e një vizite në rajon.
Pedros Sancez tha se vendi i tij do të vazhdojë të mos e njohë Kosovën.
“Unë mendoj që miqtë e mirë siç është Shqipëria dhe Spanja, mund të kenë edhe mosmarrëveshjet e veta. Ne mendojmë se është shkelur e drejta ndërkombëtare dhe nuk mund të jemi në favor të këtij pranimi. Është një opinion që nuk e ndajmë me qeverinë shqiptare, por kjo nuk do të thotë që ne nuk e nxisim dialogun me Prishtinën për tu bashkuar në Unionin evropian”, tha kryeministri spanjoll.
Të dyja qeveritë firmosën një marrëveshje të përbashkët për luftimin e krimit ndërkombëtar./abcnews.al/
