Javë më parë Qeveria e Republikës së Kosovës i propozoi Kuvendit të Kosovës shkarkimin e Kimete Gashit, nga pozita e anëtares së Organit Shqyrtues të Prokurimit. Pikërisht kjo çështje është shndërruar në “mollë sherri” ndërmjet pozitës dhe opozitës, në mbledhjen e sotme të Komisionit për Buxhet, Punë dhe Transfere, shkruan Fol Drejt.
“Sot i propozojmë Kuvendit shkarkimin e anëtares së Organit Shqyrtues të Prokurimit, zonjës Kimete Gashi e cila ka udhëhequr vendimin e dëmshëm për qytetarët e Kosovës” – pat thënë Kryeministri Kurti, ndërsa pat argumentuar se tenderi për insulina, i cili u bë shkak për shkarkimin e Gashit, ishte një vendim i dëmshëm.
Në mbledhjen e komisionit u vazhdua diskutimi për këtë çështje, ndërsa debatin e nxiti Kryetari i Komisionit, deputeti Armend Muja i cili tha se Bordi i OShP-së ka tentuar të bëjë kontrabandë me barna, ndërsa e ilustroi argumentin me dy vendime, njëri i vitit 2019 dhe tjetrin në vitin 2021, ku tha se ka kontradiktë mes tyre.
Nga ana tjetër vetë Kimete Gashi, insistoi në ligjshmërinë e vendimet për tenderin për insulina, ku tha se i njëjti është vërtetuar edhe nga gjykatat e rregullta.
Nën anën tjetër, deputetët opozitarë e kanë kundërshtuar këtë vendim. Më saktë, Lidhja Demokratike e Kosovës (LDK) dhe Partia Demokratike e Kosovës (PDK), e kanë quajtur anti-ligjor vendimin e Qeverisë së Kosovës për shkarkimin e Kimete Gashi, anëtare e Organit Shqyrtues të Prokurimit.
“Pse është vendim i tillë, pse është ndarë vetëm një anëtar. Qeveria është dashur të vijë të tregojë për vendimin, konkretisht ministri i Shëndetësisë, e jo në këtë mënyrë…” – ka thënë anëtari i këtij komisioni nga radhët e LDK-së, Avdullah tha Hoti.
I një mendjeje me të ishte edhe i PDK-së Ferat Shala, i cili kërkoi që ministri i Shëndetësisë të vijë në Komision e ta arsyetojë vendimin./FolDrejt/
