Pak orë pas ndeshjes futbollistike ndërmjet Rumanisë dhe Kosovës, e cila la shije të hidhur tek tifozët shqiptarë, e ku u theksua roli shumë destruktiv i arbitrit kryesor të ndeshjes, një tjetër përfaqësim i një tjetri niveli pritet ta vë Kosovën përballë me një “skuadër” shumë më “të rrezikshme”, ndërsa për arbitër do ta ketë vetë Bashkimin Evropian, shkruan Fol Drejt.
Takimi ndërmjet Kryeministrit Albin Kurti dhe Presidentit të Serbisë Aleksandër Vuçiq, i paralajmëruar për nesër, nuk pritet të sjell rezultate të mëdha, thonë njohësit e zhvillimeve politike në vend. Shprehimisht, të dyja palët kanë thënë se janë të interesuara që procesin ta dërgojnë drejt një marrëveshjeje përfundimtare, e cila do t’i sillte vendeve jo vetëm siguri, por edhe mundësi të reja në rrugën e integrimeve euro-atlantike.
Vuçiq e ka fajësuar vazhdimisht Kryeministrin e Kosovës për “obskurantizëm” politik, por ishte ky i fundit që shprehu gatishmëri për ta nënshkruar planin evropian të propozuar në Bruksel, muaj më parë. Në thelb, Serbia po kërkon me ngulm formimin e Asociacionit të Komunave me Shumicë Serbe, por qeveria aktuale e ka bërë të qartë që formimi i këtij entiteti, nuk guxon të bie ndesh me Kushtetutën e Republikës së Kosovës.
I pyetur pikërisht për këtë, nëse Kosova po vijon të luaj rol bllokues për sa i përket Asociacionit, dhe marrëveshjes përgjithësisht, Kurti është përgjigjur:
“Nuk do të thosha që perëndimi është homogjen ndaj qeverisë së Republikës së Kosovës, edhe atje ka zëra shumë të ndryshëm lidhur me atë se çfarë po ndodh dhe çfarë duhet të bëhet, por nuk duhet të harrojmë edhe faktin që ne kemi qenë të gatshëm ta nënshkruajmë marrëveshjen me 27 shkurt në Bruksel, ndërsa me 18 mars gjithashtu edhe në Ohër dhe është pala serbe ajo që e ka refuzuar nënshkrimin.
Sa i përket situatës në veri të Kosovës, ne kemi thënë që angazhohemi për deeskalim dhe më duhet të konstatoj që deeskalimi praktikisht ka ndodhur. Në duhet të mos kemi rieskalim, veçse rieskalimi potencial i ka rrënjët veçse në Beograd dhe kurrsesi në Prishtinë. Besoj që i është bërë e padrejtë Kosovës. Ne e kemi pranuar marrëveshje me 11 nene dhe gjashtë pika të preambulës, marrëveshja e Asociacionit të komunave me shumicë serbe nga viti 2013 konsiderohet në mesin e 39 marrëveshjeve, në nenin 10 të marrëveshjes bazike që ne e kemi bërë. Pra, neni 10 thotë se marrëveshjet e kaluara 39 sosh që janë të vlefshme dhe të obligueshme duhet të zbatohen, por aty janë 39 dhe jo vetëm dy” – ka thënë ai në një intervistë për Deutsche Welle (DW).
Gazetarja nga DW e cila e intervistoi kryeministrin, gjithashtu u shpreh skeptike për sa iu përket rezultateve konkrete pas takimit që pritet të ndodhë. Në një intervistë të dhënë për Telegrafin Adelheid Feilcke, shefe e Programit për Evropën në DW, tha se:
“Për fat të keq në situatën e tanishme kur kemi luftë në Ukrainë është më se e rëndësishme të arrihen marrëveshjet këtu në rajon për të vepruar së bashku. Por, për këtë duhet një vullnet i përbashkët e kjo gjë nuk po shihet. Ka interesa të ndara mes vendeve të Ballkanit Perëndimor, por edhe në BE ka vende me interesa të ndryshme”, ka thënë Feilcke, duke shtuar se për këtë duhet një zgjidhje përfundimtare e një gjë e tillë nuk po shihet shumë afër.”
Se epilogu i procesit të bisedimeve nuk po shihet gjëkundi, këtë përshtypje e ka edhe gazetari Imer Topanica. Autori i emisionit KUADËR, mendon se Bashkimi Evropian si një ndërmjetësues, nuk është treguar neutral në kuptimin e mbikëqyrjes dhe udhëheqjes së procesit. Ashtu si në ndeshjen Rumani, Kosovë, BE e ka ndëshkuar padrejtësisht Kosovën, ndonëse Serbia ka vijuar t’i mbaj lidhjet e pashkëputura edhe me Rusinë.
“Aleksandër Vuçiq, autokrati i cili i ka ushqyer për një kohë të gjatë strukturat paralele në Kosovë, duke i shfrytëzuar për sa herë e ka ndjerë të nevojshme për ngjalljen e atmosferës nacionaliste, përkatësisht shoviniste, do të takohet me një populist tashmë të rryer si Albin Kurti. Presidenti i Serbisë, Vuçiq, ka një interes që t’ia vazhdojë status quo-në veriut të Kosovës, ndërsa Kryeministri Kurti ka interes t’i jap fund një procesi sa të dëmshëm, ashtu edhe të stërzgjatur. Por motivet në këtë “lojë”, nuk e bëjnë diferencën. Në thelb të diskutimeve mbetet Asociacioni, çështje për të cilën pala kosovare, nuk ka propozuar diçka konkrete, përveç refuzimit të idesë që ai institucion, të mos i shkelë parimet kushtetuese të vndit.
Vlen të thuhet që, përkundër përpjekjes për t’u treguar konsistent në qëndrime në kuadër të procesit të bisedimeve përballë Serbisë, përkatësisht që “s’ka qerre para kalit”, zëvendësi i tij Besnik Bislimi para disa ditësh pohoi ta kenë bërë pikërisht këtë. Sipas Bislimit “Kosova bëri lëshim të madh që pranuam marrëveshjen pa njohje formale.” Dua të them, në këto rrethana, të dy palët do të jenë të rezervuara të hedhin hapa të tjerë të pamatur, meqë prej këtyre fijeve varet fati i tyre në politikë./FolDrejt/
