Nëse nuk jeni me ne, ju s’mund të kaloni! – Rimishërimi burokratiko-sovjetik i PVD
Shkruan: Fitim Nuhiu
Vizitën e zv. Kryeministrit të Kosovës, Besnik Bislimi dhe ministres së Arsimit, Arbërie Nagavci, në Luginë të Preshevës, qytetarët e mirëpritën me shumë optimizëm dhe me një shpresë që krerët e lartë të politikës dhe qeverisë së Kosovës nuk e harruan Luginën e Preshevës, dhe jo vetëm me vizita sa për foto dhe shtrëngim duarsh, por ata erdhën me premtime konkrete dhe që diçka do të bëjnë për këta qytetarë jetimë në Luginë të Preshevës, dhe do të ndajnë 2 milionë euro për shoqërinë civile vendase, shoqëri që duke aplikuar me projekte konkrete që bartin aktivitete në ruajtjen dhe kultivimin, avancimin e artit, gjuhës, arsimit e identitetit kombëtar shqiptar në Luginë të Preshevës do të mund të përfitojnë financiarisht nga Kosova.
Sinqerisht, besoj se z. Kurti është i zgjuar dhe di të vlerësojë situatat politike si në vend ashtu dhe në rajon, mirëpo animi i “tij” drejt një subjekti politik, duke përjashtuar të tjerët, apo mashtrimi që iu është bërë nga po këto qarqe, u pa se këtu ka një deviancë të tij politike, se këtu i ka ikur diçka nga dora me apo pa vetëdije, kjo do të shihet dhe do të reflektohet në ditët në vijim, që besoj se shumë shpejt, nëse do ta kupton, do të ndërmerr masa dhe të heq qafe këshilltaren e tij të zgjedhur për Luginën e Preshevës, që realisht vetëm e aftë nuk është për një gjë të tillë, plus kësaj edhe partia nga cila vjen zonja në fjalë, s’ka mbetur asgjë që i përket popullit që nuk ia ka gllabëruar dhe kjo është dëshmuar këto dy dekadat e fundit dhe se nuk e ka kredon që të ngarkohet me detyra të reja publike, politike e kombëtare.
Qeveria e Kosovës në bashkëpunim të ngushtë me Këshillin Nacional Shqiptar, i udhëhequr nga subjekti politik PVD dhe PDSH, vendosën që mjetet e dedikuara për projektet, t’i bartin tek Këshilli Nacional Shqiptar, ku kjo e fundit do të shpallë konkursin publik, ku në komisionin vlerësues do të jenë shumica nga qeveria e Kosovës dhe një nga subjekti politik i PVD-së, të paktën kështu deklaratifisht dhe oficialisht, mirëpo, siç u pa, Kosova ia kishte lënë të gjitha vlerësimet në dorë të PVD-së. Mu këtu mendoj se hendeku u thellua dhe u ndanë ujërat se ku do të shkojnë dhe kush do të përfiton projektet, gjegjësisht këto mjete.
Përfaqësuesit e shoqërisë civile, organizata jo qeveritare, artistë, shkrimtarë, dhe njerëz të fushës së kulturës, etj, ia mësyen konkursit publik, t’i mbushin formularët dhe të shkruajnë projektet e tyre, me shpresë që mund të pranohen dhe të gëzojnë të drejtën e tyre për të zhvilluar mendimet, projektet dhe aktivitetet e tyre, dhe të përfitojnë financiarisht nga ky donacion. Deri këtu gjithçka shkoi vaj, edhe pse disa konkurentë kishin dyshimet e tyre, është fjala ata që s’kishin librezat partiake dhe simpatinë e parties, por shpresën e zgjatën deri në ditën e shpalljes së përfituesve të këtyre granteve. Sapo u shpall lista e përfituesve, u kuptua që avazi i vjetër i PVD-së, normalisht ka vazhduar, me një kryeneçësi naive, madje me një idiotësi “hajt be se nuk e marrin vesh kta, me rëndësi na t’ja ngjesim dishka”. Tani, detajet nuk dua t’i rendisë këtu, sepse këtë gjë tashmë e kanë bërë shumë reagues të mëparshëm, parti politike dhe të pakënaqur nga kjo zallamahi, dhe ky krim financiar i parasë publike, i taksapaguesve kosovarë. Reaguesit e mëparshëm i kanë renditur faktet dhe argumentet, shoqatat e regjistruara një ditë para se të del konkursi, njerëz të afërt (militantë) të Ardita Sinanin dhe subjektit që ajo përfaqëson, njerëz që asgjë prej gjëje s’kanë bërë në aspektin qytetar publik, përpos që rrinë nëpër kafenetë publike me lugën e makiatos n’gojë. Në këto grante janë përjashtuar shumë njerëz dhe organizata serioze që janë të dëshmuara me aktivitetet të llojllojshme, por që “fatkeqësisht” nuk e kanë pasur librezën partiake dhe vulën e militantizmit, dhe nuk kanë mundur ta kalojnë pragun e pranimit dhe kalimit.
Disa projekte të tilla serioze që nuk kanë kaluar, janë:
– Shoqata për Trashëgimi dhe Krijimtari Kulturore, me në krye z. Xhemaledin Salihu;
– Projekti i Skender Latifit, gazetar i mirënjohur mbarëkombëtar dhe i dëshmuar me krijimtarinë e tij publicistike, për një projekt që ka qenë shumë serioz për kulturën, historinë dhe traditën e Luginës së Preshevës;
– Projekti i Grupit Letrar nga shkolla fillore “prof. Ibrahim Kelmendi” një grup goxha aktiv që është dëshmuar, me aktivitete afro dy vjeçare, që ka kërkuar një shumë tepër simbolike për sigurimin e librave letrarë për nxënësit e kësaj shkolle;
– Projekti për një Shtëpi Botuese vendase, që kam qenë bartës i këtij projekti, gjë që do të ishte e para e kësaj natyre, dhe nuk është parë e arsyeshme një projekt i tillë që të kalojë, etj, etj… dhe kur ta mendosh (sepse ne njihemi mes vete për punët dhe aktivitetet publike që bëhen në Luginë) se cilët projekte kanë marrë dritën jeshile dhe kanë kaluar, është për të qarë e për të vajtuar për gjendjen tonë mjeruese.
Atëherë nga gjithë ky turp, kam kuptuar se:
– Sipas tyre, ata që nuk dëgjojnë e nuk binden politikisht, mos të lodhen kot, sepse nuk kalojnë, e nuk përkrahen nga lart, kaq!
– Sipas tyre, zëri kritik kundrejt tyre duhet të vdesë njëherë e mirë, nëse duam të përkrahemi financiarisht.
Mirëpo sidoqoftë dua të shpresoj akoma se ky vend e ky popull mund të bëhet:
– Shpresa e fundit për Luginën ka qenë (dhe duhet të jetë) Kosova, ama jo e Ardita Sinanit;
– Njerëzit e vullnetit të mirë, do të duhet të mbështeten (përkohësisht, që të mos shuajnë edhe ato pak ëndrra që kanë) vetëm në kapacitetet e tyre personale dhe profesionale (nëse janë mundësitë ekipore edhe më mirë) dhe të bëjnë aq sa ia lejojnë mundësitë e tyre financiare.
Mbetem me shpresë që Kryeministri i Kosovës, do të duhet urgjentisht të reflektojë se ku e dërgon paranë publike të taksapaguesve të varfër kosovar, sepse kjo është (pa)përgjegjësi e lartë kombëtare, këtë gjë ai e di shumë mirë, se me kë ka bashkëpunuar dhe se duhet gjetur mekanizmat dhe kanalet e besueshëm dhe serioz për projekte të tilla në të ardhmen, sepse ndryshe humb edhe seriozitetin e vet dhe vullnetin e mirë të tij karshi shqiptarëve jashtë kufijve të Kosovës por edhe brenda saj, sepse u kuptua se Kryeministri dhe njerëzit e tij kësaj here u mashtruan nga kanalet fekale nga Lugina që kanë arritur të bashkëpunojnë.
P.S. Të drejtën e ankesës, nuk duam ta shfytëzojmë, nuk duam të bëjmë cic mice me këso gjëra fëmijësh, ngase njeriu ankohet kur mendon se Autoriteti (KNSH-PVD) drejtues posedon drejtësi, e nga kjo kërdi publike, nuk presim mëshirë dhe as reflektim, me këto struktura vendore të kriminalizuara financiarisht, që nëse nuk ndryshohen, nuk do të ketë asnjë progres. Ju faleminderit që nuk na keni kaluar projektin tonë serioz, sepse do të gjejmë rrugët e duhura dhe legjitime për aktivitetet tona, sepse edhe ashtu-kështu jemi mësuar t’ia dalim vetë.
E gjitha që kërkoj është që drejtuesit e Kosovës, respektivisht të qeverisë Kurti, të REFLEKTOJNË se kujt ia kanë dhënë besimin e bashkëpunimit, kanaleve vendase nga Lugina, sepse ideja dhe qëllimi i tyre, veçanërisht i z. Kurti, sigurisht që ka të bëjë dhe nuk dyshoj aspak në gjëra serioze pozitive mbarëkombëtare për qytetarët e Luginës, mirëpo është e kotë nëse mjetet dedikuese për qytetarët e denjë shkojnë (gjë që kanë shkuar) në duart e gabuara.
