Sot nga BE ka folur zëdhënësi i saj, Peter Stano, për propozimin e Brukselit zyrtar sa i përket Asociacionit të Komunave me Shumicë Serbe. Stano ka thënë se ai iu është dorëzuar palëve dhe se do të presin komentet e tyre.
Stano ka thënë se shpresojnë në përgjigje pozitive, por që sot nuk është mundësia për të bërë deklarime finale apo për të arritur rezultat final sa i përket modelit evropian për Asociacionin duke shtuar se e gjithë kjo është pjesë e procesit të dialogut.
Tutje Stano ka thënë se ajo që është e nevojshme, është de-eskalimi dhe ristartimi i dialogut.
“Sot nuk është vërtetë mundësia për të bërë deklarime apo arritur rezultat final. Kjo është pjesë e procesit. Sepse procesi duhet të ristartohet me energji të plotë dhe përkushtim të plotë. Që do të thotë në mënyrë konstruktive dhe pa parakushte. Për të punuar menjëherë në të gjitha obligimet dhe Asociacioni është një ndër to, dhe për de-eskalim që është jashtëzakonisht i nevojshëm”, ka thënë Stano për Kanal10, duke shtuar se përmbushja e detyrimeve vlen për të dy palët.
Stano ka thënë se për këtë takim do të flasin liderët e BE-së dhe të shteteve anëtare para hyrjes në takimin e Këshillit të BE-së.
