Remitencat e diasporës shqiptare, vazhdojnë të jenë një burim financiar për mirëmbajtjen e ekonomisë kosovare, shkruan Fol Drejt.
Sipas një raporti të Bankës Qendrore të Kosovës (BQK) ekonomia “e eurozonës vazhdoi të ndikohet nga zhvillimet gjeopolitike të ndërlidhura me luftën në Ukrainë, specifikisht, dobësimi i aktivitetit ekonomik, presionet inflacioniste dhe shtrëngimi i politikës monetare, dinamika që kanë dobësuar kapacitetin ripagues të borxhit të ekonomive familjare dhe ndërmarrjeve.”
Po sipas këtij raporti në tremujorin e tretë të vitit 2022, ekonomia e eurozonës ka shënuar rritje prej 2.1%, rritje kryesisht e mbështetur nga kërkesa e brendshme.
Sa i përket llogarisë rrjedhëse në tremujorin e tretë të vitit 2022, raporti thotë se u shënua një “bilanc pozitiv prej 157.5 milionë euro, kryesisht si rezultat i numrit më të lartë të ardhjes së diasporës, gjë që ka ndikuar në rritjen e bilancit të shërbimeve ndërkohë që edhe remitencat e pranuara shënuan rritje të përshpejtuar.”
Në përgjithësi gjatë vitit 2022, diaspora ka dërguar 59.4 milionë euro më shumë, se sa vitet e tjera. 702.1 milionë euro janë transferuar me anë të agjencive të dërgesave të parëve, kurse pjesa tjetër me anë të bankave komerciale dhe kanaleve alternative.
“Remitancat përbëjnë një ndër financuesit kryesor të konsumit, dhe kanë një pjesëmarrje prej 14.1 përqind në gjithsej BPV-në e gjeneruar në vend. Vlera e remitancave të pranuara në TM3 2022 arriti në 349.1 milionë euro, një rritje vjetore prej 13.6 përqind krahasuar me periudhën e njëjtë të vitit paraprak (grafik 17).
Remitancat kryesisht vijnë nga Gjermania (39.4 përqind), Zvicra (18.2 përqind) dhe SHBA-të (8.2 përqind e gjithsej remitancave të pranuara në Kosovë). Përveç faktorit altruist që karakterizon dërgesat e emigrantëve në Kosovë, e që mund të jetë përforcuar si pasojë e tkurrjes së të ardhurave të disponueshme në ekonomi si
pasojë e inflacionit, rritja e remitancave gjatë muajve të verës mund t’i atribuohet edhe zhvlerësimit të euros ndaj valutave tjera. Në TM3 2022, është vënë re një rritje prej 21.6 përqind e remitancave të dërguara përmes bankave, ndërsa remitancat përmes agjencioneve për transferimin e mjeteve shënuan rritje prej 14.3 përqind” – thuhet ndër të tjera në raport.
Për një rritje të ekonomisë ka folur edhe Kryeministri i Republikës së Kosovës Albin Kurti. Sipas kryeministrit, ky ishte edhe vizioni i qeverisë.
“Progresi ekonomik nuk është hamendësim e as rastësi. Ai është rezultat i politikave të duhura dhe qeverisjes së mirë. Shifrat dhe indikatorët më lart janë dëshmia jonë për këtë” – shprehej kryeministri para disa muajsh.
Megjithatë, inflacioni i lartë i ka goditur ekonomitë familjare, sidomos ato të shtresës së mesme. Pakënaqësia me situatën e pasigurt ekonomike, sipas ekspertëve, qytetarët janë duke e artikuluar nëpërmjet rrugëve të tjera: duke ikur nga Kosova, prandaj sipas tyre, remitencat janë më se të mirëseardhura për t’i përballuar shpenzimet./FolDrejt/
