Ky është epitafi i shkruajtur nga kryeministri Edi Rama për mikun e tij të ndjerë dhe themeluesin e Top-Channel, Dritan Hoxha. Kur e lexoni epitafin plot realitet për Tanin e Topit, nuk keni si të mos vëreni edhe mjeshtërinë e të shkruarit me plot stil të gjuhës shqipe nga Edi Rama. Për këtë, foldrejt.com, ua sjell shkrimin e kryeministrit të sotëm, shkruar pak orë pas vdekjes së Dritan Hoxhës në një aksident tragjik.
Edi Rama
Sot (23 maj 2008) vdiq një njeri nga ata që bëjnë histori. Tani i Topit arriti i vetëm për 7 vjet atë që vendeve si Shqipëria u duhen 70 vjet për të arritur. Ai jetoi me 300 km në orë dhe fluturoi larg, duke kapur ëndrrën e tij dhe duke ndezur ekranin e shekullit të ri në një Shqipëri që ende jeton pas perdes së shekullit të vjetër. Vepra madhështore që Tani i Topit ndërtoi me intuitën e një gjeniu dhe pasionin e një fëmije, është modeli i një suksesi të barabartë me një jetë frenetike të jetuar në timon. Pa e ulur shpejtësinë për asnjë dekikë. Pa pyetur për orën dhe as për rreziqet e rrugës. Pa fjetur, përveçse duke mbyllur sytë, për të ecur më shpejt.
Pas profesionistëve e talenteve që në mikrofonin e “Top Albanias” dhe ekranin e “Top Channel” gjetën oazin e zhvillimit të tyre në kushte optimale, ishte jeta e një njeriu në kërkim të pareshtur të cilësisë më të mirë. Pas prurjes së pandalshme të risive të komunikimit, formateve moderne të pasqyrimit të aktualitetit, të qeshurave therëse të “Fiksit” e atyre me lot të “Portokallisë”, tingujve të “Top Festit” dhe jehonës së stadiumeve të botës së Super Sportit në kohë reale, ishte jeta e një njeriu në garë me kohën. Pas tasteve të telekomandës që çelte çdo vit dritare të reja në shtëpitë tona, ishte jeta e një njeriu që s’mund të plakej.
Ikja e tij, përgjithnjë nga kjo botë që nuk i mjaftoi asnjëherë, le pas kudo trishtimin e thellë për ç’ka humbi sot Shqipëria. Së bashku me dhimbjen e madhe tek unë, për humbjen e një njeriu të jashtëzakonshëm, që pata fatin ta njoh nga afër qyshse nisi t’i japë jetë ëndrrës, për të cilën qe lindur dhe të cilës i kushtoi jetën.
