Shtetet e Bashkuara akuzuan Sekretarin e Përgjithshëm të OKB-së Antonio Guterres se iu dorëzua kërcënimeve ruse duke refuzuar të dërgojë zyrtarë në Ukrainë për të inspektuar dronët e prodhuar nga Irani që Rusia ka përdorur për të sulmuar Ukrainën, raporton The Kyiv Independent, përcjell Fol Drejt.
Sipas ShBA-së, Britanisë, Francës, Gjermanisë dhe Ukrainës, furnizimi me dronë të prodhuar nga Irani në Rusi shkel një rezolutë të Këshillit të Sigurimit të OKB-së të vitit 2015 mbi marrëveshjen bërthamore të Iranit.
“Na vjen keq që OKB-ja nuk ka lëvizur për të kryer një hetim normal të kësaj shkeljeje të raportuar,” tha zëvendësambasadori i ShBA-së në OKB Robert Wood më 19 dhjetor.
“Jemi të zhgënjyer që Sekretariati, me sa duket duke iu dorëzuar kërcënimeve ruse, nuk ka kryer mandatin hetimor që i ka dhënë ky këshill”, tha ai.
Në përgjigje, Guterres u tha gazetarëve se furnizimi me dronë të prodhuar nga Irani në Rusi po shikohet “në një pamje më të gjerë të gjithçkaje që po bëjmë në kontekstin e luftës për të përcaktuar nëse dhe kur duhet” të dërgojmë zyrtarë në Kiev, raportoi Reuters.
Rusia i është drejtuar përdorimit të dronëve kamikazë Shahed të prodhuar nga Irani, më të lirë se raketat balistike dhe ato lundruese, për të nisur sulmet në Ukrainë, veçanërisht në infrastrukturën kritike.
Presidenti Volodymyr Zelensky tha se Rusia kishte porositur mbi 2,400 dronë nga Irani. /FolDrejt/
