Michael Doyle, zëdhënës i Dhomave të Specializuara të Kosovës (DhSK) në Hagë, përmes platformës online “Zoom”, ka thënë se në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit, trupi gjykues ka konstatuar se pjesë të caktuar të një nga dëshmitarët që ka dhënë dëshmi në tetor 2023 të rikalsifikohen si publike.
“Kjo është rrjedhojë e urdhrit gojor të Trupit Gjykues, të lëshuar në nëntor, në të cilin u përcaktua procedura për rishikimin e transkripteve të seancave private, me qëllim që më shumë prej tyre të bëhen publike, duke vazhduar njëkohësisht garantimin e mbrojtjes së dëshmitarëve”, tha Doyle.
Zëdhënësi i DhSK-së, tha se në këtë çështje gjyqësore gjatë kësaj jave janë mbajtur vetëm tri seanca në të cilat kanë vazhduar dëshmitë dy dëshmitar.
“Këtë javë, në gjykimin e Hashim Thaçit, Kadri Veselit, Rexhep Selimit dhe Jakup Krasniqit, seancat u mbajtën të martën, të mërkurën dhe të enjten. Dëshmitari i 41-të i thirrur nga Prokuroria vazhdoi dhënien e dëshmisë të martën. Sipas Prokurorisë, dëshmitari është i afërm i familjes së një viktime të vrasjes së paligjshme dhe zhdukjes me forcë nga Drenoci. Dëshmitari po dëshmon me masa mbrojtëse dhe kryesisht në seancë private. Gjatë seancës së sotme, dëshmitari i 39-të i Prokurorisë z. Dejan Jeftiq, vazhdoi dëshminë e tij, e cila filloi më 11 dhjetor 2023. Sipas përmbledhjes së shkurtër të lexuar nga Prokuroria në dhjetor, dëshmitari u arrestua nga shqiptarë të armatosur në korrik të vitit 1998, disa prej të cilëve kishin uniforma të zeza dhe më pas u çua në Budakovë”, tha Doyle.
Doyle tha se me 17 janar kryetarja e DhSK-së, ka caktuar edhe panelin e Gjykatës Supreme për të marrë vendim lidhur me kërkesat e Salih Mustafës.
“Më 17 janar, Kryetarja e DHSK-së, Trendafilova caktoi Panelin e Gjykatës Supreme për të marrë vendim në lidhje me kërkesën e dorëzuar nga Mbrojtja e Salih Mustafës, që kërkon zgjatjen e afatit për dorëzim të kërkesës për mbrojtjen e ligjshmërisë. Gjykatësit Ekaterina Trendafilova (kryegjykatëse), Kristinë Van den Vajngart, dhe Daniel Fransen janë caktuar anëtarë të Panelit”, tha Doyle.
Ai th ase me 25 janar, Paneli i Supremes nxori dy vendime në çështjen ndaj Mustafës e që njëri kishte të bëntë me ndërprerjen e përfaqësimit të avokatës Alegandra në këtë cështje.
“Në vendimin e parë, Paneli përcaktoi se znj. Venkateswari Alagendra nuk e kishte njoftuar Trupin Gjykues II (në të cilin është i akuzuar Jakup Krasniqi dhe të cilin ajo gjithashtu e përfaqëson) lidhur me synimin e saj që të përfaqësojë z. Mustafa, siç kërkohet me Kodin e Etikës në mënyrë që të pranonte vendimin e Trupit Gjykues nëse ekziston ndonjë konflikt interesi. Rrjedhimisht, Paneli deklaroi se emërimi i Alagendra si avokate e re e Mustafës nuk ka efekt juridik dhe urdhëroi Administratoren që të caktojë mbrojtësin kujdestar për të përfaqësuar Mustafën derisa të zgjidhet çështja”, tha zëdhënësi i DhSK-së.
Michael Doyle tha se vendimi i dytë kishte të bënte me hedhjen e kërkesës së Mustafës lidhur me zgjatjen e afatit për dorëzimin e kërkesës për mbrojtje të ligjshmërisë.
“Në vendimin e dytë, Paneli i Gjykatës Supreme hodhi poshtë kërkesën e Mbrojtjes së Mustafës lidhur me zgjatjen e afatit për të dorëzuar kërkesën për mbrojtjen e ligjshmërisë dhe vuri në dukje se afatet kohore të parashikuara në Ligj lidhur me kërkesat për mbrojtjen e ligjshmërisë nuk mund të ndryshohen me Rregulloren e Punës dhe të Provave dhe se znj. Alegandra nuk ka legjitimet për ta dorëzuar kërkesën”, tha Doyle.
Ndër zhvillimet që karakterizuan Specialen këtë javë sipas Doyle është edhe vazhdimi i paraburgimit për Pjetër Shalën.
“Në çështjen gjyqësore të Pjetër Shalës, më 19 janar, Trupi Gjykues urdhëroi vazhdimin e paraburgimit të z. Shala, duke konstatuar se vazhdon të ekzistojë rreziku që ai mund të pengojë procesin dhe të kryejë krime të tjera kundër dëshmitarëve që kanë dhënë dëshmi në këtë çështje gjyqësore dhe/ose janë paraqitur në gjykatë. Trupi Gjykues vazhdon të jetë i mendimit se këto rreziqe mund të zvogëlohen mjaftueshëm vetëm me anë të kornizës për monitorimin e komunikimeve që përdoret në objektin e paraburgimit të Dhomave të Specializuara”, tha Doyle.
Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë./BetimipërDrejtësi
