Ministrja e Ekonomisë, Artane Rizvanolli, tha se thirrjet e Qeverisë për kursim të energjisë sollën rezultate brenda disa ditësh.
Ajo, në “Rubikon” të Klan Kosovës, tha se gjatë muajit shkurt ka pasur rënie të konsumit për 10 për qind më shumë se që ishte parashikuar, derisa shtoi se në këtë kohë nuk ka gati asgjë më patriotike se kursimi i energjisë elektrike.
“Kjo është gjëja më e mirë që mund të bëjmë, është mirë që të kemi informim të drejtë të qytetarëve sepse megjithëse nuk është faji ynë, nuk është faji i qytetarëve që jemi në këtë gjendje ku jemi, në fakt qytetarët janë ata që mund të bëjnë më të mirën dhe në fakt ka edhe shumë lajme pozitive, ka shumë aspekte pozitive, për shembull pas thirrjeve për kursim të energjisë është arritur brenda disa ditëve që piku apo kulmi të kthehet në orën 11 të natës në krahasim me orën 6 pasdite, që mund të duket arritje e vogël por është shumë e madhe sepse dallimi në çmim të importit në 6 pasdite dhe në 11 të natës është shumë i madh, gjatë shkurtit kemi pasur ulje të konsumit për 10 për qind në krahasim me atë që ka qenë e parashikuar, është shumë mirë që njerëzit kanë kursyer energji, dua t’i falënderoj të gjithë qytetarët që kanë kursyer, që kanë racionalizuar duke e përdorur më shumë energjinë gjatë natës, sepse në këto momente që po jetojmë gati nuk ka asgjë më patriotike dhe më të mirë për xhepin tonë dhe buxhetin e shtetit që të kursehet energjia elektrike”.
Ministrja e Ekonomisë tha se kriza energjetike pritet të vazhdojë. Duke folur për kritikat e opozitës për menaxhimin e kësaj krize, ajo tha se nuk duhet pasur iluzion që gjërat mund të ndryshojnë brenda natës, derisa shtoi se Qeveria është duke punuar në disa projekte për efiçiencën e energjisë që kapin shifrën e dhjetëra milionë eurove për këtë vit.
“Çfarë jemi duke punuar për muajt dhe vitin e ardhshëm janë projektet e efiçiencës së energjisë, dhjetëra milionë euro investime në efiçiencë të energjisë parashihen për këtë vit, menaxhohen përmes institucioneve të ndryshme, disa përmes bashkëpunimit me donatorët dhe disa përmes institucioneve vendore, do t’i përmend vetëm disa, në proces të realizimit për sivjet janë 9 ndërtesa dhe 250 shtëpi, po flasim për termoizolime me ndihmën e MCC-së dhe 410 gra ndërmarrëse kanë marrë grante për masat e efiqiencës për bizneset e tyre, 67 projekte në 21 komuna në ndërtesa, ndriçim publik dhe fotovoltaike, tanimë ndoshta kanë filluar, në fund të marsit ka qenë i paraparë realizimi i tyre të projekteve të ndryshme në efiçiencë të energjisë”.
