Cristiano Ronaldo thotë se ai dhe Lionel Messi “ndryshuan historinë e futbollit”, por rivaliteti mes tyre tani ka “ikur”, shkruan BBC Sport, transmeton Fol Drejt.
Të konsideruar gjerësisht si më të mëdhenjtë e të gjitha kohërave, ata shpesh u përballën me njëri-tjetrin në La Liga të Spanjës, në kohën kur luanin për Real Madridin dhe Barcelonën.
“Ne jemi të respektuar në të gjithë botën, kjo është gjëja më e rëndësishme”, tha Ronaldo së fundmi.
Pesë herë fituesi i Topit të Artë, Ronaldo, është lënë jashtë listës së ngushtë për herë të parë që nga viti 2003, ndërsa Messi mund ta fitojë atë për të tetën herë.
“Ai e bënë rrugën e tij, unë e bëj timen. Ai ka bërë punë të mirë, nga sa kam parë. E trashëgimia vazhdon”, shtoi 38-vjeçari Ronaldo, i cili tani luan në Arabinë Saudite për Al-Nassr.
Kur u pyet nëse urrejtja ishte një tipar i rivalitetit të tyre, ai tha: “Ata që pëlqejnë Cristiano Ronaldon nuk duhet ta urrejnë Messin. Unë nuk e shoh të tillë rivalitetin.”
“Rivaliteti iku. Ishte mirë, e pëlqeu spektatori. Ne ndamë skenën për 15 vjet dhe përfunduam, nuk them miq, por jemi kolegë profesionistë dhe respektojmë njëri-tjetrin”.
Mes tyre, dyshja që thyen rekorde kanë fituar shumë nga pjesët më prestigjioze që loja ka për ta ofruar.
Ronaldo është golashënuesi rekord i të gjitha kohërave te Real Madridi me 451 gola në 438 paraqitje, fitues i 16 trofeve me klubin duke përfshirë katër Liga të Kampionëve, dy tituj të La Ligës dhe dy Copa del Rey në një periudhë nëntëvjeçare në Bernabeu.
Messi, i cili tani luan për Inter Miami në Shtetet e Bashkuara, mban rekordet e të gjitha kohërave të Barcelonës për gola dhe paraqitje, duke shënuar 674 gola në 781 paraqitje.
36-vjeçari fitoi 35 trofe me klubin, duke përfshirë 10 tituj të La Ligës, katër trofe të Ligës së Kampionëve dhe shtatë herë Kupën e Mbretit.
Në skenën ndërkombëtare, Messi fitoi Kupën e Botës 2022 dhe një Kupë të Amerikës me Argjentinën, ndërsa Ronaldo ka fituar një kampionat evropian dhe një Ligë të Kombeve me Portugalinë.
Të dy janë përballur me njëri-tjetrin në fushë 36 herë – takimi i fundit ishte në janar, kur Messi, në atë kohë që luante për Paris St-Germain, mundi Al Nassr-in e Ronaldos 5-4 në një miqësore./FolDrejt/
