Cristiano Ronaldo dhe Lionel Messi do të luajnë Botërorin e tyre të pestë dhe ndoshta të fundit në Katar, shkruan Al Jazeera, përcjell Fol Drejt.
Lojtari i Argjentinës dhe Paris Saint-Germain, 35-vjeçari, Messi, njoftoi në tetor se Kupa e Botës 2022 do të jetë e fundit për të, ndërsa 37-vjeçari portugez, Ronaldo ende nuk ka komentuar për të ardhmen e tij ndërkombëtare.
Për më shumë se një dekadë, bota e futbollit ka debatuar se kush është më i mirë. Diskutimi ka të ngjarë të vazhdojë shumë pasi ata të pensionohen.
Teksa dy gjigantët e lojës arrijnë fundin e karrierës së tyre, ne hedhim një vështrim në performancat e tyre gjatë më shumë se 17 viteve të lojës së futbollit në nivelin më të lartë.
Garat ndërkombëtare
Ronaldo ka luajtur 191 ndeshje ndërkombëtare krahasuar me 164 të Messit, para ndeshjes hapëse të Argjentinës në Kupën e Botës kundër Arabisë Saudite.
Karriera ndërkombëtare e ish-yllit të Real Madrid filloi në vitin 2003, ndërsa Messi, i cili u largua nga Barcelona vitin e kaluar për në Paris, luajti ndeshjen e tij të parë ndërkombëtare dy vjet më vonë kundër Hungarisë.
Kur bëhet fjalë për rekordin e tyre të golave, Ronaldo është shumë përpara rivalit të tij argjentinas.
Ylli portugez ka shënuar 117 herë, një rekord nga ai. Messi ka 90 gola në emër të tij.
Të dy lojtarët kanë fituar nga një kompeticion të madh në nivel ndërkombëtar, me Ronaldon që fitoi Kampionatin Evropian në 2016 dhe Messin që fitoi Kupën e Amerikës në 2021.
Historia në Kupën e Botës
Në eventin më prestigjioz të futbollit, Messi ka luajtur 19 ndeshje, dy më shumë se konkurrenti i tij portugez.
Ronaldo sërish kryeson në repartin e golashënuesve me shtatë gola, një më shumë se Messi.
Megjithatë, mes të dyve, vetëm Messi ka arritur në një finale të Kupës së Botës, në Kupën e Botës 2014 në Brazil. Gjigantët e futbollit të Amerikës së Jugut humbën ndaj Gjermanisë në kohën shtesë 1-0.
Kishte njëfarë ngushëllimi për Messin pasi mori në shtëpi Topin e Artë për paraqitjen më të mirë në Kupën e Botës në Brazil. Në anën tjetër, Ronaldo ka arritur një herë në fazën gjysmëfinale, në vitin 2006.
Garat për klube
Ronaldo ka shënuar 701 gola në të gjitha garat e klubeve ndërsa Messi ka 695 – duke i bërë ata golashënuesit kryesorë në nivel klubesh në historinë e futbollit.
Por portugezi ka luajtur 100 ndeshje më shumë se Messi, duke i dhënë këtij të fundit një epërsi për mesataren e golave.
Megjithatë, kur bëhet fjalë për asistimet, 35-vjeçari argjentinas është shumë larg Ronaldos, me gati 50 për qind më shumë se portugezi. /FolDrejt/
