Ekipet e shpëtimit po kërkojnë për dhjetëra të tjerë që u raportuan të zhdukur pas një rrëshqitjeje dheu në kryeqytetin e Kamerunit, Yaounde, shkruan Al Jazeera, përcjell Fol Drejt.
Një rrëshqitje dheu gjatë një ceremonie funerali në kryeqytetin e Kamerunit ka vrarë të paktën 14 persona, tha guvernatori rajonal, ndërsa shpëtimtarët vazhduan kërkimin për dhjetëra të tjerë që mbeten të zhdukur.
Fatkeqësia ndodhi të dielën teksa njerëzit u mblodhën në një fushë futbolli në bazën e një argjinature dheu 20 metra të lartë në Yaounde.
Dëshmitarët i thanë agjencisë së lajmeve Reuters se argjinatura u shemb mbi dhjetëra njerëz.
“Në vendngjarje numëruam 10 trupa, por para mbërritjes sonë, katër trupa ishin marrë tashmë,” tha Paul Bea, guvernatori i rajonit të Qendrës që përfshin Yaounde.
“Ka gjithashtu një duzinë rastesh të të lënduarve rëndë të nëpër spitale,” tha ai.
Guvernatori e përshkroi zonën ku ndodhi rrëshqitja e dheut si një “pikë shumë e rrezikshme” dhe i inkurajoi njerëzit të qëndronin larg rrethit Damas në periferinë lindore të Yaounde.
Ndër ata që mbijetuan ishte 50-vjeçarja Marie Claire Mendouga.
“Ne sapo kishim filluar të kërcenim kur toka u shemb”, tha ajo për agjencinë e lajmeve AFP.
Ajo tha se “shkoi të gërmonte me duart e saj” në përpjekje për të nxjerrë njerëzit nga nëntoka.
Rrëshqitjet e dheut ndodhin relativisht shpesh në Kamerun, por rrallëherë janë aq vdekjeprurëse sa incidenti i së dielës në Yaounde.
Dyzet e tre njerëz u vranë në qytetin perëndimor të Bafoussam në vitin 2019, kur një rrëshqitje dheu e shkaktuar nga shirat e dendur rrëmbeu një duzinë banesash të pasigurta të ndërtuara në buzë një kodre. /FolDrejt/
