Presidenti i Kazakistanit, Kassym-Jomart Tokayev, pranoi dorëheqjen e qeverisë së tij pas protestave të dhunshme për rritjen e çmimeve të karburantit. Tokayev emëroi Alikhan Smailov si kryeministër në detyrë.
Tokayev kishte shpallur një gjendje të jashtëzakonshme dy-javore në kryeqytetin Almaty dhe provincën e Mangystau, pasi protestat shpërthyen në disa vende.
Protestat e së martës erdhën pasi autoritetet hoqën kufijtë e çmimeve të gazit të lëngshëm të naftës (LPG), duke lejuar që çmimet e karburanteve të rriteshin ndjeshëm.
Pas një rritje të çmimit të karburantit, protesta me mijëra pjesëmarrës u mbajtën në qendrën e naftës Mangystau të Zhanaozen.
Demonstratat u përhapën në pjesë të tjera të Mangystau dhe Kazakistanit perëndimor, duke përfshirë qendrën provinciale Aktau dhe kampin e punëtorëve Tengizchevroil.
Policia përdori gaz lotsjellës dhe granata trullosëse për të nxjerrë protestuesit nga sheshi kryesor i Almaty, raporton DW, transmeton Klankosova.tv.
Kur njoftoi dorëheqjen e qeverisë së tij, Tokayev tha gjithashtu se kufiri i çmimit do të rifutej si një rregullim i përkohshëm i çmimeve për një periudhë prej 180 ditësh.
Rajoni Mangystau varet nga LPG-ja si karburanti kryesor për automjetet. Rritjet e çmimeve të karburanteve ndikojnë edhe në çmimin e ushqimeve, i cili është rritur ndjeshëm që nga fillimi i pandemisë së koronavirusit.
Shumë qytetarë atje i përdorin makinat e tyre me LPG, i cili në Kazakistan është më i lirë se përdorimi i benzinës për shkak të kufizimeve të çmimeve. Qeveria hoqi kufijtë më 1 janar, me argumentin se çmimi i ulët ishte i paqëndrueshëm.
