Radiotelevizioni i Serbisë dhe Ministria e Punëve të Brendshme të Serbisë financuan xhirimet e filmit “Dosja e Kosovës – Shtëpia e Verdhë” me regji të Sllagjana Zariq. Filmi së shpejti do të shfaqet premierë, raporton Klix, përcjell Fol Drejt.
Zariq pohon se filmi bazohet në “raportin e Dik Martit, si dhe në një dokument të Misionit të Kombeve të Bashkuara në Kosovë (UNMIK) të vitit 2003, i cili përmban deklaratat e dëshmitarëve, ish-pjesëtarëve të Ushtrisë Çlirimtare të Kosovës (UÇK), të cilët morën pjesë në transportin e serbëve të kapur dhe joshqiptarëve të tjerë nga Kosova në territorin e Shqipërisë”.
“Sipas UNMIK-ut – këtij dokumenti, rreth 300 serbë të rrëmbyer janë transferuar nga kampet e Kosovës në burgjet e improvizuara në Shqipëri. Serbët e kapur janë transportuar me furgona, kamionë frigoriferë, madje ndonjëherë edhe në këmbë i kanë çuar në Shqipëri. Ata janë mbajtur nëpër shtëpi private në Bicaj, Kukës, Burel, fshatin Ripa…”, tha ajo.
Filmi i përmendur flet edhe për “Shtëpinë e Verdhë” ku dyshohet se u janë hequr organet disa serbëve të kapur. Kjo nuk është vërtetuar kurrë. /FolDrejt/
