Ministri i Jashtëm kinez, Wang Yi tha se marrëdhëniet e vendit të tij me Moskën përfaqësojnë “një nga marrëdhëniet dypalëshe më të rëndësishme në botë”.
Ministri i Jashtëm i Kinës, Wang Yi sot e ka quajtur Rusinë “partnerin më të rëndësishëm strategjik të Pekinit”, duke refuzuar të dënojë sërish sulmin e Rusisë ndaj Ukrainës, shkruan AA.
Wang Yi tha se marrëdhëniet e Kinës me Moskën përfaqësojnë “një nga marrëdhëniet dypalëshe më të rëndësishme në botë”, Fol Drejt.
“Pavarësisht se sa i rrezikshëm është peizazhi ndërkombëtar, ne do të ruajmë fokusin tonë strategjik dhe do të promovojmë zhvillimin e një partneriteti gjithëpërfshirës kinezo-rus në epokën e re”, tha Wang në një konferencë për media.
Kina qëndroi në anën e Rusisë pas sulmit ndaj Ukrainës. Kjo është arsyeja pse SHBA-ja, Bashkimi Evropian dhe aleatët e tyre vendosën sanksione të shumta ndaj Moskës.
Kina argumenton se sovraniteti dhe integriteti territorial i të gjitha kombeve duhet të respektohet, por se sanksionet ngrenë çështje të reja dhe prishin procesin e zgjidhjes politike.
Vëmendje e madhe iu kushtua takimit mes liderit kinez Xi Jinping dhe presidentit rus Vladimir Putin në Pekin më 4 shkurt, pas së cilës u lëshua deklarata e tyre e përbashkët, duke riafirmuar “mbështetje të fortë reciproke për mbrojtjen e interesave të tyre thelbësore”.
Të paktën 364 civilë janë vrarë ndërsa 759 janë plagosur në Ukrainë që kur Rusia nisi luftën kundër shtetit të Evropës Lindore më 24 shkurt, tregojnë të dhënat e OKB-së.
Agjencia e OKB-së për Refugjatët (UNHCR) tha se më shumë se 1.5 milionë refugjatë janë shpërngulur nga Ukraina në vendet fqinje, duke thënë se kjo është kriza e refugjatëve me rritjen më të shpejtë në Evropë që nga Lufta e Dytë Botërore.
UNHCR-ja ka paralajmëruar se nëse situata në Ukrainë përshkallëzohet më tej, deri në 4 milionë civilë mund të largohen nga vendi./FolDrejt/
