Moska ka ndaluar hyrjen në Rusi për 500 shtetas amerikanë, përfshirë ish-presidentin Barack Obama, raporton Anadolu Agency, përcjell Fol Drejt.
Ministria e Jashtme ruse publikoi listën të premten, duke thënë se vendimi ishte marrë në përgjigje të një pakete të re sanksionesh anti-ruse, të shpallur nga Shtëpia e Bardhë më 19 maj.
“Në përgjigje të sanksioneve anti-ruse, të vendosura rregullisht nga administrata e (Presidentit) Joe Biden, të cilat janë krijuar, sipas planit të Uashingtonit, për të shkaktuar dëme maksimale ndaj Rusisë, duke prekur personalisht zyrtarët dhe qytetarët e thjeshtë të vendit tonë, si kundërmasë, hyrja në Federatën Ruse është e mbyllur për 500 amerikanë”, tha ministria.
Ministria vuri në dukje se lista përfshin krerët aktualë të niveleve të ndryshme të pushtetit ekzekutiv, ish-zyrtarë, ligjvënës të zgjedhur për herë të parë në nëntor 2022, figura publike dhe drejtues të kompanive që furnizojnë me armë Ukrainën.
Përveç kësaj, Moska futi në listën e zezë njerëzit në qeveri dhe agjencitë e zbatimit të ligjit “të cilët janë të përfshirë drejtpërdrejt në persekutimin e disidentëve në vazhdën e të ashtuquajturit “Sulmi i Kapitolit”.
Shërbimi diplomatik njoftoi gjithashtu se refuzoi edhe një herë kërkesën e Ambasadës Amerikane në Moskë për të vizituar gazetarin Evan Gershkovich, të arrestuar për spiunazh, në përgjigje të vendimit të Uashingtonit për të refuzuar aplikimet për viza amerikane të gazetarëve rusë, të cilët do të shoqëronin të huajt. Ministri Sergej Lavrov gjatë udhëtimit të tij në selinë e OKB-së në prill. /FolDrejt/
