Anësori në formë i Arsenalit, Bukayo Saka, do të startojë përpara Phil Foden në ndeshjen hapëse të Kupës së Botës të Anglisë kundër Iranit të hënën, shkruan Goal.com, përcjell Fol Drejt.
Anglia fillon fushatën e saj në Kupën e Botës në Katar të hënën kundër Iranit në Grupin B. Menaxheri Gareth Southgate do të startojë me Saka në formë kundër skuadrës së Carlos Queiroz, sipas The Telegraph. 21-vjeçari do të jetë titullar përpara Fodenit të Manchester Cityt pas një fillimi të suksesshëm të sezonit ku ka shënuar pesë gola dhe ka dhënë gjashtë asistime për Topçinjtë që janë në krye të tabelës.
Përfshirja e Saka në formacionin fillestar do të jetë një shpërblim i merituar për fillimin e tij mbresëlënës në sezonin me Arsenalin. I riu pati një ndikim edhe si rezervist herën e fundit për Anglinë. Saka hyri në lojë së bashku me Mason Mount dhe ndihmoi Tre Luanët të shpëtonin me një barazim 3-3 kundër Gjermanisë, pasi po pësonin 2-0 në Ligën e Kombeve në shtator.
Southgate pritet të rikthehet në një katërshe mbrojtëse kundër Iranit, me Harry Maguire në qendër të mbrojtjes së bashku me John Stones. Kieran Trippier dhe Luke Shaw thuhet se do të jenë dy mbrojtësit e krahut të Anglisë. Southgate ka të ngjarë të fillojë gjithashtu Jude Bellingham në mesfushë së bashku me Declan Rice, me Saka pjesë e sulmit që do të ketë gjithashtu Mount, Raheem Sterling dhe kapitenin Harry Kane.
Tre Luanët lojën e parë në botëror e zhvillojnë kundër Iranit dhe më pas përballen me Shtetet e Bashkuara të premten. /FolDrejt/
