Sekretari amerikan i Shtetit, Antony Blinken, mund të telefonojë ose të takojë personalisht kryeministrin e Kosovës Albin Kurti dhe presidentin serb Aleksandar Vuçiq në lidhje me dialogun mes Kosovës dhe Serbisë.
Kështu tha zëdhënësi i Departamentit të Shtetit, Ned Price, i cili nuk e mohoi mundësinë e përfshirjes direkte të Sekretarit Blinken kur u pyet nëse ky i fundit mund t’i telefonojë ose t’i takojë në Washington Kurtin dhe Vuçiqin para datës 1 shtator.
“Nëse mendojmë se angazhimi i sekretarit [Antony Blinken] nëpërmjet telefonit ose personalisht është i domosdoshëm për të arritur diçka në vijën e finishit, Sekretari Blinken nuk heziton të marrë telefonin dhe të bëjë ato biseda”, ka thënë ai për “The Pavlovic Today”.
Price tha se ShBA-ja po e vëzhgon dialogun e ndërmjetësuar nga BE-ja derisa inkurajon Kosovën dhe Serbinë që ta përdorin këtë mundësi në mënyrë efektive.
“Ne kemi qenë thellësisht të angazhuar si vëzhgues në dialogun e ndërmjetësuar nga BE-ja ndërmjet Kosovës dhe Serbisë. Ashtu siç thashë javën e kaluar, mirëkuptimi ynë është se bisedimet janë në vazhdim. Ne jemi duke vëzhguar. Ne po e bëjmë këtë në partneritet me BE-në dhe po inkurajojmë të dyja palët që ta përdorin dialogun në mënyrë efektive”.
“Është një dialog që ne e mbështesim shumë dhe mendojmë se është detyrë e të dyja palëve që ta shfrytëzojnë maksimalisht këtë mundësi për të çuar përpara diskutimet e tyre për normalizimin e marrëdhënieve të përqendruar edhe në njohjen reciproke gjithashtu”.
Zëdhënësi i Departamentit të Shtetit ka thënë se i dërguari amerikan për Ballkanin Perëndimor, Gabriel Escobar, do të udhëtojë në Prishtinë dhe Beograd pikërisht për të treguar mbështetjen e ShBA-së për dialogun.
