Iniciativa qytetare “Mbijetesa serbe” nga Mitrovica e Kosovës, sipas mediave serbe, po kërkon mbajtjen e një referendumi i cili që do ta shpallte veriun e Kosovës protektorat ndërkombëtar nën kujdesin e misioneve ndërkombëtare, shkruan Fol Drejt.
Sipas Danas, kjo iniciativë ka propozuar që mandati i administratës ndërkombëtare të fiksohet për një periudhë dyvjeçare, me mundësi vazhdimi edhe për dy vjet, nëse është e nevojshme.
Si arsye ata përmendin moskoordinimin e veprimeve të autoriteteve të Prishtinës dhe akterëve ndërkombëtarë që shkaktojnë përshkallëzim, gjegjësisht miratimin e vendimeve të njëanshme që ndikojnë negativisht në jetën e qytetarëve në veri të Kosovës. Ata theksojnë se kërkesa e tyre nuk është një akt secesionist.
“Qeveria në Prishtinë ka kohë që po merr vendime të njëanshme që ndikojnë negativisht në jetën e qytetarëve në veri të Kosovës. Politika e papërgjegjshme e z. Albin Kurti bëri që serbët e veriut të Kosovës të largohen nga institucionet e Kosovës pas 10 vitesh. Veprimet e pakoordinuara të autoriteteve të Prishtinës me aktorët ndërkombëtarë shkaktuan një përshkallëzim në terren në maj të këtij viti. Fatmirësisht me atë rast është shmangur një konflikt në përmasa të mëdha. Duke pasur parasysh situatën e vështirë në të cilën ndodhet Evropa për shkak të luftës në Ukrainë, një skenar i tillë nuk do të ishte në interesin e askujt”, thuhet në njoftimin e kësaj nisme.
Mbijetesa serbe shton se Qeveria e Kosovës nuk ka ndërmarrë hapa të rëndësishëm në drejtim të deeskalimit.
“Duke njohur shqetësimin e të gjitha komuniteteve për mbijetesën e tyre në këtë zonë dhe dëshirën për paqe dhe bashkëjetesë, duke iu referuar parimeve të demokracisë pjesëmarrëse dhe të drejtës për vetëvendosje, kërkojmë mbajtjen e një referendumi në të cilin qytetarët do të votojnë në mënyrë demokratike për vendosjen e një administrate ndërkombëtare – një protektorat ndërkombëtar nën kujdesin e misionit të përhershëm prezent në Kosovë (OKB, KFOR, EULEX) – në territorin e veriut të Kosovës, d.m.th. mbi komunat e Mitrovicës Veriore, Zveçanit, Zubin Potokut dhe Leposaviqit. Ftojmë të gjithë aktorët politikë, socialë dhe joqeveritare, si dhe individë, të na bashkohen në mbështetje të kësaj ideje dhe të japin kontributin e tyre. Kjo është një çështje ndërpartiake për ruajtjen e paqes dhe jetës normale në veri të Kosovës”, thonë ata.
Ata thonë se “kriza tashmë e përhershme” në veri të Kosovës shkaktoi emigrimin e përshpejtuar të popullsisë nga kjo zonë.
“Shqetësimi për situatën e përgjithshme është shprehur qartë nga aktorë të shumtë ndërkombëtarë. Madje, pas negociatave të dështuara gjatë raundit të fundit të dialogut, është e qartë se Qeveria e Kosovës nuk ka ndërmend të ndryshojë qasje”, thonë nga “Mbijetesa serbe”, duke theksuar se kjo është reflektuar edhe në konferencën e djeshme të Kryeministrit Albin Kurti në Prishtinë./FolDrejt/
