Zëvendëskryeministri i parë dhe ministri i Punëve të Jashtme i Serbisë, Ivica Daçiq, do të takohet sot në ora 14:00 me ambasadorin e Federatës Ruse Aleksandar Boçan Harçenko, shkruajnë mediat serbe, transmeton Fol Drejt.
Takimi vjen pasi Daçiq deklaroi se Serbia e ka lënë të hapur mundësinë që vendimi për vendosjen e sanksioneve ndaj Rusisë për shkak të sulmit ndaj Ukrainës do të ndryshojë, nëse ekonomia dhe qytetarët serbë fillojnë të pësojnë dëme të pariparueshme.
Meqenëse vendimi (Këshilli i Sigurisë Kombëtare) është ende në fuqi, do të thotë që ne nuk e kemi ende atë rast”, tha Daçiq për Kuririn e sotëm, duke shtuar se është në interesin e Serbisë që të mos vendosë sanksione ndaj Rusisë, por monitorimi se si reflektohet ai vendim në ekonominë serbe.
Sipas tij, përveç presionit ndaj Serbisë për shkak të mos vendosjes së sanksioneve, ka rënë edhe shkëmbimi tregtar i jashtëm ndërmjet dy vendeve, ndërsa “në disa vende perëndimore që kanë vendosur sanksione ndaj Rusisë është rritur”.
Pas reagimeve të publikut për këtë deklaratë, ai tha se nuk ka thënë asgjë të re kur ka deklaruar se Serbia e ka lënë të hapur mundësinë e vendosjes së sanksioneve ndaj Rusisë, por se mediat kanë raportuar pjesë interesante për ta.
Ai përsëriti se sanksionet mund të vendosen nëse ekonomia dhe qytetarët serbë fillojnë të pësojnë dëme të pariparueshme, pra nëse ka presione shtesë, por se tani për tani nuk ka nevojë të shqyrtohen sanksionet kundër Rusisë.
Ai theksoi se kjo qeveri nuk do ta çojë vendin në izolim.
Daçiq tha në Happy TV se shkëmbimi tregtar i Serbisë me Rusinë nuk ishte kurrë i madh, mezi dy deri në tre miliardë dollarë, dhe se pjesa më e madhe ishte importi i energjisë nga Rusia, dhe se tani ata që supozohet se vendosën sanksione kanë një shkëmbim më të madh tregtar me Rusinë se më parë./FolDrejt/
