Administrata e presidentit amerikan Joe Biden po shqyrton mundësinë e dërgimit të automjeteve luftarake Bradley në Ukrainë si pjesë e një pakete mbështetjeje ushtarake për t’u mbrojtur kundër agresionit rus, raporton Ukrinform., përcjell Fol Drejt.
Burimet thonë se ende nuk është marrë vendimi përfundimtar për këtë çështje.
Një zëdhënës i Shtëpisë së Bardhë, i cili gjithashtu foli në kushte anonimiteti, tha se ShBA është vazhdimisht në kontakt me Ukrainën për aftësitë që i duhen asaj për t’u mbrojtur kundër Rusisë, por aktualisht nuk ka asnjë informacion të ri që mund të shpallet publikisht.
Sipas Mark Cancian, një ish analist i buxhetit të mbrojtjes në Shtëpinë e Bardhë, i cili tani punon në Qendrën për Studime Strategjike dhe Ndërkombëtare, Bradleys mund të sigurojë një rritje të konsiderueshme në aftësinë luftarake në tokë, sepse në thelb është një “tank i lehtë”.
“Ndryshe nga M113-të e ofruara më parë, Bradley është i armatosur rëndë me një armë të fuqishme 25 mm dhe raketa antitank TOW. Shtetet e Bashkuara kanë shumë Bradley, megjithëse disa janë më të vjetër dhe kanë nevojë për përmirësime, kështu që inventarët nuk janë problem,” vuri në dukje ai.
Raportohet se pala ukrainase aktualisht po kërkon nga aleatët e saj tanke, raketa me rreze të gjatë veprimi, automjete të blinduara dhe sisteme të mbrojtjes ajrore.
Siç raportohet më herët, Sekretari amerikan i Shtetit, Antony Blinken njoftoi se sistemet Patriot janë përfshirë në paketën e re të ndihmës ushtarake për Ukrainën me vlerë 1.85 miliardë dollarë. Ministri i Mbrojtjes i Ukrainës, Oleksii Reznikov, tha se ushtria ukrainase do të zotërojë shpejt Patriotët. /FolDrejt/
