Në 18 qershor Këshilli i Europës jep vendimin nëse Shqipëria dhe Maqedonia Veriore do nisin negociatat me Bashkimin Europian. Pavarësisht se të enjten Bundestagu gjerman duhej të fillonte një diskutim rreth Maqedonisë Veriore, ajo nuk ndodhi. Shteti i vogël në qendër të Ballkanit, që pas shumë vitesh arriti reforma decizive si asnjë shtet tjetër në rajon, tashmë përsëri ndodhet në hapësirën e pritjes.
Përgjegjës për pritjen akoma të Maqedonisë Veriore janë politikanët e linjës së ashpër në CDU dhe CSU, të cilët nuk duan ti japin dritë jeshile, shkruan Der Standard, përcjell foldrejt.com. Ngjashëm Franca, Hollanda dhe Danimarka nuk duan të nisin negociatat me Maqedoninë Veriore, por këto tre shtete arsyetohen me Shqipërinë. Për shkak të Shqipërisë që këtë verë e ka të pamundur që të hap negociatat, për këtë duhet të privohet edhe Maqedonia Veriore.
Në fakt Komisioni Europian ka rekomanduar tetë herë hapjen e negociatave me Maqedoninë Veriore (prej 2005 ajo kishte statusin Kandidat), por shkaku i kontestit të emrit me Greqinë ajo nuk mund të ndodhte. Për këto reforma, përmirësimin e marrëdhënieve me fqinjët, vendosjen e drejtësisë, Zoran Zaev meriton çdo respekt, përcjell foldrejt.com.
Eksperti i Europës juglindore në Universitetin e Gracit, Florian Bieber, thekson se në rast se Europa nuk hap negociatat, “atëherë qeveria e Shkupit do zhytet në një krizë të madhe dhe opozita mund të ngrejë krye duke argumentuar se ndryshimi i emrit kishte ndodhur si një mendjelehtësi e qeverisë pa pëlqimin e BE.”
Në të ardhmen kjo do ishte një sinjal për qeveritë ballkanike për të kryer “pseudo-reforma” dhe të qëndrojnë në qeveri me “stil autoritar dhe popullist”.
Në rast se reformat kanë rrezik dhe nuk sjellin shpërblim, atëherë asnjëri nuk do zgjidhte këtë rrugë.
“Me fjalë tjera, kjo do ishte vdekje e zgjerimit të Bashkimit Europian,” analizon Bieber.
Si pasojë e mospjekurisë europiane, qeveritë e atjeshme do zhyteshin ngjashëm në popullizëm dhe do fillonin të koketonin me fuqitë e tjera si Rusinë, Turqinë dhe Kinën.
BE mundohet të shmang ndikimin e shteteve të lartëpërmendura në Ballkanin Perëndimor, megjithatë nuk është e gatshme të hap negociatat me Maqedoninë Veriore këtë verë.
Për të mos përfunduar këtu, në 7 korrik janë zgjedhjet e përgjithshme në Greqi, ku konservatorët e Nea Dimokratia mund të fitonin zgjedhjet dhe në politikat e saj të jashtme është kundër çdo lloj zgjerimi të BE në vendin fqinj të saj.
Me këtë varroset modeli i fundit i suksesshëm i BE me Ballkanin Perëndimor./Foldrejt.com
