Analisti politik, filozofi dhe publicisti Shkëlzen Maliqi, për mediumin Danas, i ka komentuar zhvillimet e fundit në Kosovë, përkatësisht raportet e tensionuara të saj me Serbinë, shkruan Fol Drejt.
Sipas Maliqit, i dërguari special i Bashkimit Evropian për dialogun Kosovë – Serbi në takimet me Kryeministrin Albin Kurti dhe Presidentin Aleksandër Vuçiq, po përpiqet t’i identifikojë arsyet e bllokimit dhe cenimit të Marrëveshjes së Ohrit nga të dyja palët, me veprime të tyre krejtësisht të qëllimshme.
Duke komentuar faktin se BE-ja tashmë ka bërë një rrugë të gjatë në vendosjen e sanksioneve ndaj Qeverisë Kurti, si dhe shpalljen e sanksioneve ndaj Serbisë, nëse regjimi i Vuçiqit nuk i plotëson kërkesat e shtruara, i intervistuari i Danas thekson se autoritetet në Prishtinë ishin në dilema se pse vetëm ata ishin nën ndikimin e masave ndëshkuese.
“Kur Brukseli javën e kaluar shpalli masa ndëshkuese vetëm për Kosovën dhe jo edhe për Serbinë, në Kosovë u prit me mosbesim dhe çudi se pse vetëm njëra palë dënohej, kur të dyja palët po kontribuonin në përshkallëzimin e situatës” – citohet të ketë thënë Maliqi.
“Mendoj se ndëshkimi i Kosovës ishte i pritshëm” – ka vijuar ai, “sepse ka një vit qeveria e Kosovës është paralajmëruar që të mos ndërmarrë masa të pakoordinuara dhe të njëanshme “sovrane”, por të bashkëpunojë për deeskalimin e krizës dhe kjo nuk ndodhi për shkak të kokëfortësisë së kryeministrit Kurti” – i cili sipas Maliqit “udhëhoqi politikën e shtyrjes së serbëve të Kosovës në demokraci, e cila vetëm sa forcoi rezistencën e tyre.”
“Amerikanët ishin të parët që humbën durimin me Kurtin, ata anuluan marrëveshjet e rëndësishme për ushtrinë e Kosovës dhe investimet e rëndësishme në projekte infrastrukturore dhe pezulluan të gjitha kontaktet e nivelit të lartë politik. Dhe tani BE-ja ka bërë të njëjtën gjë, sepse Kurti iu përgjigj tri kërkesave të BE-së për deeskalim, me tetë kërkesa të tij që vetëm sa i komplikojnë gjërat” – ka theksuar Maliqi.
Ai po ashtu është cituar të ketë thënë se Lajçaku në Prishtinë ka paralajmëruar sanksione edhe për Serbinë, të cilat do të ndërmerren, nëse kjo e fundit nuk lëvizë në drejtim të depërshkallëzimit të situatës.
“Kjo ndoshta do të thotë se Lajçak ka pranuar në parim disa pika nga lista e kërkesave të Kurtit për masa deeskaluese nga pala serbe, edhe pse nuk janë përmendur konkretisht. Se sa do të zgjasë kjo fazë e tejkalimit dhe komplikimit të negociatave për marrëveshjen është e vështirë të përfundohet, por është e qartë se Perëndimi është nervoz deri në përfundimin urgjent të lojës, pasi përshkallëzimi i tensionit mund të çojë në incidente të armatosura dhe konflikte” – ka thënë ai.
Maliqi ka thënë se lufta nuk është në prag, pasi NATO është në gatishmëri, por ka mjaft të ashtuquajtura “opsione të armatosura” në terren me formacione paraushtarake që mund të nisin aventura që, në këtë moment, janë në interes të Rusisë./FolDrejt/
