Shkrimtari britanik dhe amerikan Salman Rushdie mori pjesë në ceremoninë në Nju Jork të enjten në mbrëmje. Kjo ishte dalja e tij e parë publike që nga sulmi që për pak e vrau vitin e kaluar, transmeton Klix, përcjell Fol Drejt.
Romancieri fitues i shumë çmimeve, i cili ka jetuar në Nju Jork për 20 vjet, humbi shikimin në njërin sy pasi u godit me thikë në skenë gushtin e kaluar teksa fliste në Qendrën Amerikane të Arteve.
Të enjten, atij iu dha një çmim nderi në një ngjarje të organizuar nga PEN America, një grup që mbron lirinë e shprehjes dhe letërsisë, ku Rushdie ka shërbyer më parë si president.
75-vjeçari, i cili mbante syze me xham të zi mbi syrin e djathtë, është fotografuar në tapetin e kuq të Muzeut Amerikan të Historisë Natyrore pranë Central Park në Manhatan. Prezenca e tij nuk u njoftua para se të shfaqej për të mbajtur një fjalim emocionues para 700 të ftuarve.
“Terrorizmi nuk duhet të na terrorizojë. Dhuna nuk duhet të na pengojë. Lufta vazhdon,” tha Rushdie, sipas një deklarate të PEN America.
Rushdie jetoi i fshehur për vite pasi Udhëheqësi i parë Suprem i Iranit, Ayatollah Ruhollah Khomeini, urdhëroi vrasjen e tij për atë që ai e konsideronte natyrën blasfemuese të “Vargjeve Satanike”, botuar në 1988.
Që atëherë ai është bërë një ikonë e fjalës së lirë dhe është ende një mbrojtës i hapur i fuqisë së fjalës. Më 12 gusht, ai ishte në një konferencë letrare në qytetin e vogël kulturor të Chautauqua në veri të Nju Jorkut, kur një burrë me thikë shpërtheu në skenë ndërsa Rushdie ishte gati të fliste.
Ai u godit me thikë 10 herë dhe agjenti i Rushdie, Andrew Wylie, zbuloi në tetor se ai kishte humbur shikimin në njërin sy dhe funksionalitetin e njërës dorë. Vëzhguesit dhe rojet mposhtën sulmuesin, i cili u arrestua menjëherë, u akuzua dhe u burgos deri në gjykim.
Hadi Matar, një 24-vjeçar nga Nju Xhersi me rrënjë libaneze, është deklaruar i pafajshëm për akuzat për sulm.
“Po të mos ishin këta burra, sigurisht që nuk do të qëndroja këtu sot. Unë isha një objektiv atë ditë, por ata ishin heronjtë. Trimëria atë ditë ishte e gjitha e tyre. Unë u detyrohem atyre me jetën time,” tha Rushdie të enjten.
Në shkurt, pas botimit të romanit të tij të fundit, Qyteti i Fitores, shkrimtari tha në intervistën e tij të parë që nga sulmi se ai u përball me vështirësi të mëdha në të shkruar dhe se vuan nga stresi post-traumatik. /FolDrejt/
