Maqedonia e Veriut ka marrë mbështetje për nisjen e bisedimeve me Bashkimin Evropian nga Austria, Republika Çeke dhe Sllovenia, një ditë pasi Bullgaria tha se do të vazhdojë të përdorë të drejtën e vetos për të bllokuar anëtarësimin e Shkupit zyrtar.
Ministrat e Jashtëm të këtyre tri shteteve shprehën mbështetjen e tyre për nisjen e bisedimeve për anëtarësim me Maqedoninë e Veriut dhe Shqipërinë, duke thënë se çështjet e ndara bilaterale nuk duhet të bllokojnë zgjerimin e BE-së.
Bullgaria tha se nuk e ka ndërmend që të heqë veton për nisjen e bisedimeve mes Maqedonisë së Veriut dhe BE-së, për shkak të çështjeve kontestuese që ka me Shkupin sa i përket gjuhës dhe historisë.
Sofja, që i është bashkuar BE-së më 2007, dëshiron që Shkupi ta pranojë se identiteti dhe gjuha maqedonase kanë rrënjë bullgare.
Ministri i Jashtëm i Austrisë, Alexander Schallenberg, ai çek, Jakub Kulhanek dhe kryediplomati i Sllovenisë, Anze Logar arritën në Shkup për të ofruar mbështetjen e tyre për nisjen e bisedimeve, që është paraparë të nisin në qershor.
Këta tre ministra pritet që më 23 maj të vizitojnë edhe Shqipërinë.
Shumë shtete në Perëndim i bëjnë thirrje BE-së që të përshpejtojë procesin e bisedimeve për anëtarësim, pasi thonë se anëtarësimi i shteteve të rajonit të Ballkanit Perëndimor në bllokun evropian, është mënyrë për të luftuar ndikimin e Rusisë dhe Kinës në rajon.
Shkupi kishte aplikuar fillimisht për anëtarësim në BE më 2004 dhe kishte marrë vlerësim pozitiv nga Komisioni Evropian më 2005.
Maqedonia e Veriut arriti marrëveshje me Greqinë lidhur me emrin, duke i dhënë fund një kontesti pothuajse tridekadësh.
Shtetet e tjera të Ballkanit Perëndimor: Serbia, Mali i Zi, Kosova dhe Bosnjë e Hercegovina, janë në faza të ndryshme në rrugën e tyre drejt anëtarësimit në BE.
