Menjëherë pas vendimit të Qeverisë së Kosovës, përkatësisht Ministrisë së Industrisë, Ndërmarrësisë dhe Tregtisë e cila ka bërë të ditur se komisioni për shqyrtimin e ankesave për regjistrimin e bizneseve, ka refuzuar ankesën e “Klan Kosova” lidhur me pezullimin e certifikatës së biznesit të televizionit, kanë shpërthyer reagimet në rrjet, shkruan Fol Drejt.
Kryetari i Lidhjes Demokratike të Kosovës, Lumir Abdixhiku, ka reaguar, duke e quajtur “sulm i një pushteti autoritar ndaj fjalës së lirë”.
“Është sulm i paranojës propagandistike ndaj vet demokracisë. Ky pushtet do krizë. Ky pushtet do frikë. Në këtë betejë, të paprecedentë, nuk është vetëm një televizion. Janë të gjitha mediat, gazetarët e promovuesit e fjalës së lirë. Jemi të gjithë, individualisht e kolektivisht. Prandaj dhe në këtë përballje do të jemi bashkë të gjithë”, ka thënë Abdixhiku.
Ai tutje është shprehur se fjala e lirë do të triumfojë.
“Urdhërat e PolitByrosë nuk e mundin dot demokracinë kosovare. Shoqëria kosovare ka triumfuar dhe në përballje më të rënda. Do ta kapërcejë dhe këtë”.
I pari i LDK-së iu ka bërë thirrje organeve të drejtësisë, gjykatave të Republikës së Kosovës, që “të bëjnë detyrën e vet. Të mbrojnë vet demokracinë”.
“Urdhërdhënësit e PolitByrosë dhe ekzekutuesit e këtyre urdhrave brenda institucioneve të shtetit, do të mbahen përgjegjës para ligjit herët apo vonë. Pushtetet janë të përkohshme, shteti mbetet i përhershëm”, ka përfunduar Abdixhiku.
Edhe Kryetari i Partisë Demokratike të Kosovës (PDK), Memli Krasniqi ka reaguar duke thënë se kjo tregon që kjo qeveria po tregon tendenca diktatoriale:
“Vendimi i Qeverisë për ta mbyllur Klan Kosovën, duke i marrë çertifikatën e biznesit, është i papranueshëm, i rrezikshëm, i paligjshëm dhe kundër secilës vlerë demokratike, mbi të cilat është ngritur shteti ynë.
Kjo Qeveri e ka humbur rrugën! Nga panika, çdo ditë e më shumë po zhytet në llumin e vendimeve ta padinjitetshme dhe me tendenca diktatoriale. Prandaj, sot, jemi të gjithë të bashkuar kundër këtij vendimi autoritar dhe në mbrojtje të lirisë së shprehjes dhe medias së lirë.
Mos e mbyllni Klan Kosovën. Diktatura nuk kalon!”/FolDrejt/
