Kina apelon për dialog – Mobilizimi i pjesshëm i Moskës ‘shenjë dobësie’, thotë ambasadori amerikan në Ukrainë.
Njoftimi i Moskës për rekrutim të pjesshëm në Rusi dhe mbajtja e referendumeve për aneksimin e territoreve të Ukrainës janë “shenja dobësie, (shenja) dështimi rus”, tha sot ambasadorja e SHBA në Ukrainë, Bridget Brink , shkruan protothema, transmeton Fol Drejt.
“Referendumet tallëse dhe një mobilizim janë shenja dobësie, dështimi rus ,” shkroi Brink në Twitter, ndërsa siguroi se vendi i saj do të vazhdojë “të mbështesë Ukrainën për aq kohë sa të duhet”.
Në Pekin, Ministria e Jashtme kineze u bëri thirrje të gjitha palëve që të angazhohen në dialog dhe konsultim dhe të gjejnë një mënyrë për të adresuar shqetësimet e sigurisë së të gjitha palëve, pasi presidenti rus Vladimir Putin paralajmëroi Perëndimin për atë që ai e quajti “shantazh bërthamor”.
Pozicioni i Kinës për çështjen e Ukrainës është i qëndrueshëm dhe i qartë, tha sot zëdhënësi i Ministrisë së Jashtme kineze Wang Wenbin gjatë një konference të rregullt për shtyp .
Në Berlin, zëvendëskancelari i Gjermanisë tha se mobilizimi i pjesshëm, i urdhëruar në Rusi, ishte një përshkallëzim i mëtejshëm i konfliktit në Ukrainë dhe se qeveria gjermane po shqyrtonte përgjigjen e saj ndaj tij.
Robert Habeck tha se ky është “një tjetër hap i keq dhe i gabuar nga Rusia, të cilin sigurisht do ta diskutojmë dhe do të konsultojmë se si të përgjigjemi”.
Për një përshkallëzim shqetësues sot foli edhe zëvendësministrja e Jashtme britanike, Gillian Keegan, e cila theksoi se kërcënimet e bëra nga presidenti rus duhet të merren seriozisht. “Është e qartë diçka që ne do të duhet ta marrim shumë seriozisht sepse, ju e dini, ne nuk jemi në kontroll të situatës – nuk jam i sigurt se as ai është me të vërtetë. Ky është padyshim një përshkallëzim”, tha Keegan për Sky News.
Kujtohet se presidenti rus akuzoi sot Perëndimin për shantazh bërthamor kundër vendit të tij, në një fjalim televiziv gjatë të cilit shpalli mobilizim të pjesshëm për të mbështetur fushatën ushtarake në Ukrainë.
Putin vuri në dukje se Rusia ka “shumë armë për t’iu përgjigjur” atyre që ai i quajti kërcënimet perëndimore, duke theksuar se ai “nuk po bën bllof”.
Ai bëri thirrje gjithashtu për rritjen e fondeve për të nxitur prodhimin e armëve në Rusi.
Mobilizimi i parashikueshëm, Kievi thotë
se mobilizimi i Rusisë ishte i parashikueshëm dhe do të rezultojë jopopullor, duke sugjeruar se lufta nuk po vazhdon sipas planit të Moskës, tha sot këshilltari presidencial i Ukrainës.Mihailo Podoliak .
Në një mesazh me shkrim për Reuters, ai tha se presidenti rus Vladimir Putin po përpiqej të transferonte fajin për fillimin e një “lufte të paprovokuar” dhe të fajësonte Perëndimin për përkeqësimin e situatës ekonomike të Rusisë.
“Lëvizje absolutisht e parashikueshme, e cila duket më shumë si një përpjekje për të justifikuar dështimin e tyre (të rusëve)”, shkruante Podoliak në reagimin e parë të presidencës ukrainase pas ndërhyrjes ushtarake ruse.
“Lufta është e qartë se nuk po shkon sipas shkrimit rus, dhe për këtë arsye Putinit i është dashur të marrë vendime jashtëzakonisht jopopullore për të marrë dhe kufizuar ashpër të drejtat e njerëzve,” shkroi ai.
“Rusët që bënë thirrje për shkatërrimin e Ukrainës përfunduan duke marrë: 1. Rekrutimin. 2. Kufij të mbyllur, llogari bankare të bllokuara. 3. Burg për dezertim. Gjithçka shkon sipas planit, apo jo? Jeta ka një sens të shkëlqyeshëm humori ”, ka shkruar Podoliak në Twitter./FolDrejt/
