Majmuni Kiko denoncon në SPAK majmunin Abu!
Unë i nënshkruari majmuni Kiko, jam lindur në pyjet e Amazonës nga nëna, majmunja Kika dhe me baba të panjohur. Banues në Sarandë, me kartë 5-vjeçare rezidenti. Me arsim fillor. Beqar. I padënuar më parë, por aktualisht nën hetim për ngjarjen e datës 14 korrik 2022 me akuzën goditje për shkak të detyrës (neni 237 i Kodit Penal). Hetimi është hapur pas denoncimit të 3 policëve dhe një turisti grek ndaj të cilëve kam bërë një kundërpadi për shkak të fyerjes (neni 119 i kp), transmeton Fol Drejt.
I ndërgjegjshëm për pasojat ligjore që sjell një kallëzim i rremë,(neni 245 i Kodit Penal) kam nderin të denoncoj para jush si më poshtë:
Së pari desha të sqaroj si vijon:
Nisur nga raportimet mediatike pas ngjarjes në Portin e Durrësit ku mungonin 49 apo 60 arka me banane në kontenierin e ardhur nga Ekuadori dhe pas marrjes në pyetje dje nga prokurori për këtë çështje, në cilësinë e personit që ka dijeni për ngjarjen, dëshiroj t’iu sqaroj privatisht dhe publikisht se dje keni ngatërruar majmun. Ju lutem merruni me majmunin Abu. Në terminologjinë jurdike, ngatërrimi i personit quhet “lajthitje në objekt”.
Sikundër e shpjegova më lart unë akuzohem për krim ordiner dhe jo për krim të organizuar. Unë mund të quhem gangster, për goditjen me shpulla të 3 policëve dhe turistit grek, por kurrsesi mafioz. Nuk e mbaj dot këtë akuzë të rëndë!
Gjatë këtyre 24 orëve të fundit, i shqetësuar për cënimin e nderit dhe dinjitetit jo vetëm timin, por edhe të komunitetit që përfaqësoj, kam bërë vettingun e majmunit Abu.
Dyshimet e mia nisën kur majmuni Abu i Banaking kërkoi me këmbëngulje të hiqej urgjentisht portreti i tij, nga reklama e Banaking se medemek po i dëmtohet rëndë imazhi.
Nga kërkimet e detajuara kam marrë informacionet e më poshtme:
1.“Majmunit Abu së shpejti do t’i jepet statusi i majmunit strategjik. Pas kësaj ai do të ketë një kafaz të artë dhe plantacion bananesh në Drimadhes. Në dokumentat e paraqitura, thuhet se do të investohen miliona euro dhe do të punësohen dhjetëra e dhjetëra njerëz pasi Drimadhes do të kthehet në një atraksion turistik.
2. Nga kërkimet në google (kërkim i avancuar) më rezulton se majmuni Abu ka kontakte të papërshtatshme me majmunë me precedent në Ekuador, në Kolumbi, në Venezuelë dhe në Peru.
3. Aktivitetin kriminal në Shqipëri e ka nisur duke korruptuar njerëz të artit dhe kulturës. Në mesin e viteve 90, kur në pushtet këtu ishin demokratët, ai u lidh me Dashnor Dikon i cili me këngën e tij “Banania” popullarizoi frutin ekzotik, deri atëherë të panjohur, në Shqipëri.
4. Majmuni Abu, sot është koka e trafikut ndërkombëtar të drogës.
5. Me aktivitetin e tij, tashmë të pranuar, majmuni Abu ka hedhur poshtë teorinë e Darvinit.
6. Deviza e Abut është: njerëzit në shërbim të majmunit dhe jo e kundërta.
7. Majmuni Abu, është personi i parë i dyshuar për sulmin kibernetik te e-albania.
8. Majmuni Abu, ka financuar protestën e fundit të opozitës.
9. Majmuni Abu, është personi që lëviz paratë e incineratorëve dhe ideatori i regjistrimit të të vdekurve si administratorë kompanish. Qëllimi ka qenë për të diskretituar pasardhësit tanë, – pra ju, racën njerëzore.
10. Majmuni Abu është mbartësi i përkryer i të gjitha veseve njerëzore, përfshirë dhe krimin e organizuar, ai është një turp i species tonë dhe krenaria e botës kriminale njerëzore.
Me aktivitetin e tij, majmuni Abu, kërkon që politika në këtë vend të ushtrohet pa ndërgjegje dhe dihet nga historia që politika e ushtruar pa ndërgjegje të çon në kriminalitet.
Qëllimi final i majmunit Abu është që ta kthejë Shqipërinë, këtë mrekulli që ka falur Zoti, në një Republikë Bananesh.
Sikundër, nuk dyshoj se ju e dini i nderuar zoti Prokuror, republikat e bananeve janë republika të destabilizuara politikisht, me një lider të fortë të rrethuar nga një grup oligarkësh që synojnë të dëshpërojnë njerëzit dhe të sundojnë pafundësisht.
Krejt në fund zoti prokuror kërkoj prej jush të shënohet edhe protesta ime e fortë ndaj medias. Të gjithë flasin për mua, majmunin Kiko dhe ka një heshtje mafioze për majmunin Abu.
Me konsideratë
Majmuni Kiko.
Sarandë, 18 korrik 2022 /FolDrejt/
