“Miraj School” është shkolla e vetme shqiptare në Amerikë me të gjitha kompetencat e një shkolle në akordim me rregullat e ligjet e bordit edukativ. Ajo e filloj punën më 22 shtator 1999, me pesë nxënës të ndarë në tri paralele shkruan Fol Drejt.
Mësimi i gjuhës shqipe sipas rregullores dhe plan-programit të mësimdhënies, është obligativ për fëmijët e komunitetit shqiptar dhe jo-shqiptarë që duan t’i dërgojnë fëmijët e tyre në këtë shkollë, prej vitit të tretë të shkollës fillore deri në vitin e dytë të shkollës së mesme. Merita e themelimit dhe veprimtarisë së kësaj shkolle i takon Dhulkarnejn Vardarit, Ferid Bedrollit dhe gjithë këshillit të xhamisё – thotё veprimtari dhe humanisti Ramiz Duka.
Për “Fol Drejt” Duka shprehet se “komuniteti shqiptar sot pёr sot nё New York gёzon respektin nga tё gjitha instacat shtetёrore, qё nga polici i rrugёs e deri te guvernatori.”
Si pjesëtarë të këtij komuniteti, nxënësit e kësaj shkolle herë pas here kanë dhënë shfaqje të ndryshme në “Madison Square Garden” (Manhattan), në Montreal (Kanada), një turne në viset shqiptare me shfaqje në Prishtinë, Prizren, Dibër, Tiranë, Shkodër dhe Ulqin. Më pas, në lokalet e shkollës shfaqen programe me rastin e Pavarësisë së Kosovës, ndërsa maturantët e parë, në prag të maturës organizojnë një ekskursion tetë ditësh në Turqi. E veçanta e gjeneratës së parë ishte kremtimi i ditës së maturës më 3 qershor 2011, kur në një ambient të dekoruar, morën pjesë rreth 400 pjesëtarë të këtij komuniteti.
Diplomat për nxënësit që përfunduan me sukses shkollën e mesme “Miraj”, veç diplomave të kësaj shkolle, u lëshuan edhe prej Departamentit Edukativ për Shtetin e New York-ut, me mirënjohje e lëvdata nga: “President Barack Obama Education Award”, “New York State Senator Andrew Lanza Certificate of Merit”, “State of New York Attorney General Eric Schneiderman ‘Triple C’ for Character, Courage and Commitment”, “New York State Comptroller Thomas Dinapoli”, “Borough President of Staten Island James Molinaro”, “Assemblywomen Nicole Malliotakis Striving for Success Award”, “New York State Assemblyman Mathew J. Titone”, “New York State Assemblyman Michael J. Cusick”, “New York City Councilman James S. Oddo”, “York City Councilwoman Debi Rose”, “The Grand Lodge Knights of Pythias Award”, etj.
Pak para fillimit të pandemisë, kjo shkollë numëronte një kuadër prej 38 vetash me 220 nxënës në 14 paralele, prej parashkollorëve deri në vitin e katërt të shkollës së mesme, 40% e tyre shqiptarë dhe 60% joshqiptarë!
Deri në fundin e vitit që sapo ka nisur (2023) pritet që mësimi të fillojë edhe në objektin e ri të zgjeruar, konstruktimi i të cilit ka filluar dy vite më parë. Kjo shkollë ndonëse i përmbush të gjitha kriteret në pajtueshmëri me vendin në të cilin është themeluar, shihet nga Duka si një përfitim shumë i madh për komunitetin shqiptar atje por edhe vetë Amerikën, marrë parasysh këtu brezat të cilat kjo shkollë i nxjerr dhe të cilët kontribuojnë jo vetëm për komunitetin por edhe për vendin. Nxënës të dalë nga bankat e kësaj shkolle, kanë përfunduar me sukses dhe janë diplomuar në Universitetet e njohura, si: “Wagner Collage”, “Saint Jones University”, Rutgers University, “Staten Island University”, “Long Island University”, “Hunter Collage”, etj.
I pyetur se kush ka pёrfituar mё shumё nga ky projekt, ai është shprehur:
“Përfituesit mё tё mëdhenj janё fёmijёt tanё, brezat e shqiptarёve qё po i ndihmojnё komunitetit dhe vetё Amerikёs!”, është shprehur Duka. Nga kuadrat që nxjerr shkolla “Miraj School” ka për qëllim formimin intelektual të të rinjve në atë formë që kontributi i tyre të jetë i dyfishtë edhe duke e ruajtur traditën e komunitetit shqiptar në Amerikë, por gjithashtu edhe duke dhënë kontribut për vendin në të cilin këta kuadra zhvillojnë veprimtarinë e tyre./FolDrejt/
