Luftëtarët e Grupit Wagner nuk përbëjnë kërcënim të drejtpërdrejtë për NATO-n dhe ata kontraktorë që mbeten në Ukrainë nuk kanë ndikim të rëndësishëm në armiqësitë, raportoi Zëri i Amerikës më 1 gusht, duke cituar zëdhënësin e Këshillit të Sigurisë Kombëtare të SHBA, John Kirby, shkruan Kyiv Indendent.
Kirby tha se disa luftëtarë të Wagner janë zhvendosur në Afrikë në një përpjekje për të “rritur paqëndrueshmërinë” në vendet e kontinentit. Të tjerët mbeten në Ukrainë dhe disa u vendosën në Bjellorusi, shtoi ai.
Një numër kontraktorësh të Grupit Wagner të Yevgeny Prigozhin u zhvendosën në Bjellorusi me ftesë të autoriteteve lokale për të ofruar mbështetje trajnimi për ushtrinë bjelloruse.
Mercenarët e Wagner dhe ushtarët bjellorusë kryen stërvitje të përbashkëta pranë kufirit polak dhe Qendra Kombëtare e Rezistencës së Ukrainës raportoi se grupi ushtarak privat po kërkon rekrutë të rinj në Bjellorusi, të cilët janë të gatshëm “të marrin pjesë në armiqësi në territorin e vendeve fqinje me Bjellorusinë, në veçanti Polonia dhe Lituania”.
Transferimi i luftëtarëve Wagner ndezi alarmin në mesin e anëtarëve lindorë të NATO-s, përkatësisht në vendet baltike dhe Poloninë. Kryeministri polak Mateusz Morawiecki tha më 29 korrik se mercenarët e Grupit Wagner mund të depërtojnë në Poloni nga Bjellorusia, duke e quajtur rishpërndarjen e Grupit Wagner “një hap drejt një sulmi të mëtejshëm hibrid në territorin polak”.
Sipas Kirby, SHBA nuk është në dijeni të ndonjë kërcënimi konkret të paraqitur nga Grupi Wagner ndaj Polonisë ose aleatëve të tjerë, por Uashingtoni po monitoron nga afër situatën.
Ai ripohoi gjithashtu angazhimin e SHBA ndaj nenit 5 të Traktatit të NATO-s, i cili përcakton se një sulm ndaj një aleati është një sulm ndaj të gjithëve.
