16:18 – Këshilli i Prindërve takohet me Osmanin, kundërshtojnë grevën
Kryetari i Këshillit të Prindërve, Jeton Demi, pas takimit me presidenten Vjosa Osmani, tha se bllokimi i plotë dhe i paafat i sistemit arsimor është i paparanueshëm.
Ai është shprehur se ky bllokim është shkelje e rëndë e të drejtave të fëmijëve.
“Nuk është roli jonë që ne të gjejmë një zgjidhje mes palëve, ne kemi shprehur vlerësimin e prindërve dhe gjithë organizimet e tjera për mbrojtjen e të drejtave të fëmijëve që bllokimi i plotë dhe i paafatë i sistemin arsimor është i paparanueshëm për ne dhe si i tillë e shkel rëndë të drejtën e fëmijëve”.
I pyetur se a kanë gjetur mirëkuptim nga SBAShK-u, ai tha se nuk e kanë kërkuar një gjë të tillë.
“Nuk është se e kemi këtë mirëkuptim, nuk është se kemi kërkuar që ata ta aprovojnë, por ua kemi shprehur këtë vlerësim dhe qëndrim tonin, kanë pasur durimin ta dëgjojmë, por kanë pasur edhe argumentet e tyre, andaj ne i respektojmë ato dhe të drejtën e mësimdhënësve për mirëqenie dhe do të donim që ata të kenë një pozitë më dinjitoze dhe mirëqenie më të mirë, sepse ajo reflektohet edhe në procesin arsimor dhe edukues të fmijëve tanë, por jo duke e pamundësuar të drejtën kushtetuese të fëmijëve tanë për të vazhduar procesin edukativo-mësimor”.
Kryetari i Këshillit të Prindërve përsëriti qëndrimin se do ta bojkotojnë zëvendësimin e orëve të humbura nga greva.
16:05 – Edhe Asociacioni i Komunave shkon në takim me Osmanin
Përfaqësuesit e Asociacionit të Komunave të Kosovës sapo kanë filluar takimin me presidenten Vjosa Osmani në vazhdën e mosmarrëveshjeve mes tyre dhe Qeverisë sa i përket ekzekutimit të pagave.
Nga Asociacioni i Komunave në takim kanë ardhur Sazan Ibrahimi, Agim Aliu, Imri Ahmeti, Shaqir Totaj, Bali Muharremaj dhe Sokol Haliti.
E para e vendit pak më herët është takuar edhe me përfaqësuesit e BSPK-së.
15:54 – Jasharaj: Vendimi i Qeverisë i pakonsultuar me sindikatat, greva vazhdon
Kryetari i Këshillit Grevist të BSPK-së, Rrahman Jasharaj, i shoqëruar nga bashkëpunëtorë, pak më herët kanë hyrë në zyrën e presidentes Vjosa Osmanit.
Para takimit, Jasharaj tha se edhe përkundër se Qeveria ka vendosur të iu ndajë nga 50 euro në muaj deri në dhjetor punëtorëve publik, greva do të vazhdojë.
“Jemi optimist se zonja presidente do të jep kontributin e saj që dialogu të jetë i vërtetë. Deri më tani ky dialog ka munguar, dhe ky vendim i sotëm është i një anshëm, pa u konsultuar me sindikatat, prandaj greva vazhdon”.
12:23 – Kurti për grevën në arsim: Ta bojkotosh shkollën do të thotë ta bojkotosh shtetin
Kryeministri i Kosovës, Albin Kurti ka folur në lidhje me grevën në arsim, duke thënë se ta bojkotosh shkollën, do të thotë ta bojkotosh shtetin.
“Ne jemi me mësimdhënësit, e mësimdhënësit duhet të jenë me nxënësit, nuk bën të ndahen mësimdhënësitë nga nxënësit. Shkolla është shteti, ta bojotosh shkollën, do të thotë ta bojkotosh shtetin. Iu bëjë thirrje të gjithë mësimdhënësve që të hënën të jenë në shkollë dhe t’u japin mësim të vegjëlve tanë”, ka thënë Kurti.
Ai është shprehur se “kërkesat absurde që shumë janë dëshira arbitrare sesa mundësi reale, nuk mund të ecin përpara”, përcjell Klankosova.tv.
“Unë jam për sindikata të fuqishme edhe në sektorin privat jo vetëm publik, mirëpo kërkesat absurde, iracionale që më shumë janë dëshira arbitrare sesa mundësi reale, nuk mund të ecin përpara. Në përputhje me buxhetin e shtetit ne do t’i marrim masat tona dhe pakos së ringjalljes ne po ia shtojmë edhe 150 milionë euro këtë vjeshtë”, tha Kurti.
Tutje, Kurti tha se ka takuar kryetarin e BSPK-së, Atdhe Hykollin dhe sipas tij ky është takimi që duhej të ndodhte.
“Pardje e kam takuar kryetarin e BSPK-së, Atdhe Hykolli, sepse ai është kryetari, unë jam kryeministri dhe kështu e do rendi.Nuk mungon komunikimi, nuk mungon dialogu, mungon racionaliteti i ankesave. Greva është instrument legjitim sindikal, por jo hapi i parë, 50 euro që do t’i japin duke filluar nga shtatori do të vlejnë për këtë vit fiskal. Kjo nuk ka të bëjë me ligjin për paga e pagave, kjo ka të bëjë për përballje me inflacionin.Ne nuk shantazhohemi, ka disa muaj që ministria e financave është disa muaj duke analizuar për pakon që e prezantuam sot”, u shpreh tutje Kurti.
Tutje, Kurti tha se kur nuk nxjerr kuadro të mira arsimore, atëherë prodhon ose njerëz për asistencë sociale ose punëtorë krahu në Gjermani.
Ndryshe, në konferencën e sotme Kurti u pyet edhe për deklaratën e Elvis Hoxhës,për kryetarin e SBASHK-ut, Rrahman Jasharajn.
Kurti refuzoi të tregojë nëse do të ndërmarrë masa tij duke thënë se këtu nuk është në cilësinë e kreut të VV-së, por në atë të kryeministrit.
“Nuk mund të ua bëj analizën analistëve, as komentet komentuesve. Më vjen keq, nuk jam këtu në cilësinë e kryetarit të VV-së, por në cilësi të Kryeministrit të Kosovës”./KlanKosova/
