Presidenti Aleksandër Vuçiq në një paraqitje për RTS-në, i ka akuzuar të gjithë ata të cilët në Këshillin e Sigurimit të Kombeve të Bashkuara, dolën në mbrojtje të integritetit territorial të Ukrainës, duke thënë se po të njëjtit në mënyrë më agresive “shkatërruan integritetin territorial të Serbisë”, shkruan Danas, transmeton Fol Drejt.
Vuçiq më tej ka treguar se Kosovën ende e sheh si pjesë të Republikës Serbe, duke e theksuar me bindje se “nuk do të heqim dorë nga ajo”.
Ai e ka cilësuar Kosovën si “provincën jugore serbe” e cila “dalëngadalë po del jashtë kontrollit dhe se do të ngit si çështje në seancën e Këshillit të Sigurimit të OKB-së.
“Edhe sot në seancën e Këshillit të Sigurimit, më agresivët në drejtim të mbrojtjes së integritetit territorial të Ukrainës janë ata që në mënyrë më agresive shkatërruan integritetin territorial të Serbisë. Tingëllon paradoksale, ndonjëherë edhe qesharake, por është e vërtetë”, tha Vuçiq në një intervistë për Dnevnik të RTS.
Ai thekson se në raste të tilla flasin para sallave të zbrazëta, por shumë njerëz e lexojnë fjalimin e tyre më pas.
“Është e rëndësishme ajo që do të thuhet”. Ajo që do të themi është se do t’u përmbahemi parimeve, do t’i përmbahemi respektimit të ligjit ndërkombëtar. Ne jemi një vend i vogël, nuk kemi çfarë të kapemi tjetër. Ne nuk kemi koka bërthamore, avionë stealth, aeroplanmbajtëse, nuk kemi asnjë nga këto dhe nuk mund të konkurrojmë me të mëdhenjtë në këtë drejtim. Por ne kemi dëshirë të jetojmë në vatrat tona, në vatrat e gjyshërve dhe stërgjyshërve tanë dhe të jemi vetvetja në vendin tonë”, thotë Vuçiq.
Ai ka treguar se për këtë arsye do të diskutojë për Kosovën me miqtë e tij kinezë, si dhe do të kërkojë që kjo të jetë një temë e veçantë gjatë takimit me presidentin Xi Jinping.
“Sigurisht, për këtë do të flas më së shumti”, shton Vuçiq.
“Ne presim ndryshimin e kryetarit të Këshillit të Sigurimit të OKB-së. Brazili është nga 1 tetori. Varësisht se kur do të caktohet seanca e UNMIC-ut, atëherë do të vendosim se kur do të kërkojmë një seancë urgjente të Këshillit të Sigurimit të OKB-së për këtë çështje”, tha Vuçiq.
Ai më tutje e ka kritikuar Kryeministrin Albin Kurti duke thënë se herën e fundit ai tregoi “se do t’i realizojë kërcënimet e tij” dhe se, sipas tij, për këtë do të vuajnë serbët./FolDrejt/
