Duket që Albin Kurti, Kryeministër i Republikës së Kosovës, i ka përqendruar të gjitha energjitë në përmirësimin e raporteve të Kosovës, në rrafshin diplomatik me vendet perëndimore. Por vizitat e tij të shpeshta jashtë vendit, kanë nxitur një valë kritikash, pikërisht në këtë drejtim. “Ekspeditat” e tij diplomatike, nuk po sjellin rezultate! – konstatojnë opozitarët dhe një pjesë e njohësve të zhvillimeve politike, shkruan Fol Drejt.
Ditë më parë, zëvendëskryetarja e Partisë Demokratike të Kosovës (PDK), Vlora Çitaku, në një konferencë për shtyp ndër të tjera tha se:
“Nga njoftimet publike të qeverisë, vetëm gjatë tre muajve të fundit, kryeministri Kurti ka qëndruar 45 ditë jashtë Kosovës, por, pa sjell asnjë sukses të vetëm nga këto vizita të stërzgjatura dhe tërësisht atipike për një Kryeministër në detyrë. Gjysmën e kohës në 100 ditët e fundit, kryeministri Kurti e ka kaluar jashtë Kosovës.”
Çitaku, nuk është e vjetmja politikane e cila e ka “shigjetuar” me kritika diplomacinë e qeverisë. Për më shumë, duket se me të pajtohet edhe një pjesë e opinionit publik.
Disa nga njohësit e zhvillimeve politike në vend, e kanë analizuar situatën diplomatike dhe strategjinë të cilën po e ndjek qeveria në këtë rrafsh.
Megjithëqë për analistin Xhevdet Pozhari këto vizita janë të justifikueshme, për gazetarin dhe analistin Imer Mushkolaj sikundër edhe për politikologun Albinot Maloku, ato janë të pafrytshme, prandaj edhe duhet përmbysur strategjia.
Mushkolaj për Fol Drejt ka thënë se përveç që mungojnë rezultatet konkrete në këtë rrafsh, qeveria po i shëmbëllen një organizate joqeveritare:
“Politika e jashtme nuk ka sjellë ndonjë rezultat konkret deri më tash. Më shumë sesa e strukturuar dhe strategjikisht e përcaktuar, qasja ka qenë fragmentare. Kryeministri Kurti mund të qëndrojë me ditë të tëra nëpër vizita, por kjo nuk do të ndikojë në përgjegjësinë e tij që ka karshi qytetarëve, në këtë kohë krize ekonomike e sociale. Qeveria duhet të ndërmarrë veprime konkrete për të zbutur gjendjen e vështirë ekonomike, e jo të sillet si një OJQ duke konstatuar problemet, por pa ofruar zgjidhje.”
Të njëjtin mendim e ndanë edhe politikologu Maloku. Ai për Fol Drejt vizitën e fundit në Greqi e ka cilësuar si “vizitë private”, ndërsa takimet e zhvilluara atje, nuk kanë ndonjë dobi:
“Vizita e fundit e përvitshme e kryeministrit Albin Kurti në Greqi tek Samiti Symi është krejtësisht private dhe takimet e realizuara atje nuk kanë asnjë dobi për Kosovën. Kryeministri Kurti nuk është duke u marr aspak më gjetjen e zgjidhjeve për situatën ekonomike e sociale të qytetarëve në vend. Duke e vlerësuar përgatitjen intelektuale të tij, është për tu çuditur se si e ku po i nxjerr ato vlerësime se paska pasur në Kosovë rritje ekonomike e gjëra të tilla. Ju pyesni për strategjinë e politikës së jashtme për të cilën çështje është e angazhuar ministria Gervalla. Gjithsesi që edhe Kryeministri ka kompetencë ligjore në këtë çështje. Nuk ka asnjë lëvizje në këtë rrafsh, për pasojë vlerësimi është se në politiken e jashtme kurrë nuk kem qenë më të dështuar.”
Por ndryshe nga Mushkolaj e Maloku, mendon analisti Pozhari. Apologjinë e tij e tij ai e mbështetë në faktin se, Serbia është duke e zhvilluar një diplomaci aktive, prandaj, sipas tij, qeveria po bënë mirë që po i kundërpërgjigjet asaj.
“Strategjia e lobimit për njohjen e Kosovës tek shtetet të cilat ende nuk e kanë ndërmarrë një veprim të tillë, është më e duhura në rrethanat kur në vazhdimësi ballafaqohemi me një diplomaci agresive të Serbisë e cila në thelb ka bllokimin e procesit të njohjes së shtetit të Kosovës” – u shpreh Pozhari për Fol Drejt.
Për më tepër, sipas Pozharit, motivet e kritikave të drejtuara nga qeveria, ndërlidhen vetëm me emrin e përveçëm: Albin Kurti; e që për rrjedhojë janë pa përmbajtje:
“Sa i përket zërave kritikë, të njëjtit kohë më parë kërkonin më shumë angazhim në arenën ndërkombëtare. Sot, kur një gjë e tillë ndodh me intensitet të shtuar, prapë janë të pakënaqur, jo pse merren me ndonjë strategji, por ju pengon emri i përveçëm që sot është kryeministër i vendit. Prandaj, kritika të tilla janë më së paku racionale dhe të dobishme për diplomacinë e jashtme. Ata e kanë një qëllim të vetëm – si ta kritikojnë Albin Kurtin edhe sa herë merr frymë gjatë ditës, e jo se e kanë hallin e Kosovës.”
Ua kujtojmë se vizita tri javore e Kryeministrit Kurti (bashkë me stafin përcjellës), në Shtetet e Bashkuara të Amerikës (ShBA), e realizuar kohë më parë, i kushtoi buxhetit të Kosovës hiç më pak se 36 mijë e 722 euro. Ndërsa, ndonëse u cilësua si e suksesshme nga ana tij, nuk solli ndonjë rezultat konkret.
Këtë “thatësi” diplomatike u përpoq ta ilustronte edhe analisti Shkëlzen Gashi, i cili para disa ditësh i krahasoi 7 postimet e fundit të Kurtit në llogarinë zyrtare në Facebook, me ato të Kryeministrit Edi Rama. Ndryshe nga Kurti, që ka njoftuar për takime diplomatike, udhëtime, pjesëmarrje në samite, urime me rastin e përvjetorëve të ndryshëm etj, Rama ka njoftuar për ecurinë apo përfundimin e projekteve të ndryshme infrastrukturore.
Nuk dihet nëse pas këtyre kritikave Kurti do ta ndryshojë strategjinë, apo nëse Kosova do të korrë ndonjë fitore në rrafshin diplomatik. Gjithçka mbetet të shihet!/FolDrejt/
