Një deklaratë e organizatës joqeveritare Community Building Mitrovica (CBM), në lidhje me situatën në veri, ka nxitur reagime të shumta në rrjetet sociale, pasi që në të relativizohen veprimet e bandave kriminale, duke i barazuar me ato të institucioneve të sigurisë, shkruan Fol Drejt.
Deklarata e CBM-së e publikuar në llogaritë zyrtare në rrjetet sociale të kësaj organizate, e publikuar më 12 dhjetor, u bënë thirrje “të gjitha palëve të interesit, si vendorë ashtu edhe ndërkombëtarë, që të përmbahen nga vendimet e nxituara dhe retorika që krijon më shumë përçarje jo vetëm për popullin e rajonit të Mitrovicës, por edhe për ata që jetojnë në pjesët e tjera të Kosovës dhe në rajon.”
Po ashtu thuhet se organizata në fjalë ka zero tolerancë ndaj çdo akti që ushtrohet ndaj njerëzve që jetojnë në Kosovë, por veçon pjesëtarët e “bashkësisë ndërkombëtare që po punojnë për minimizimin e përshkallëzimit të tensioneve të shtuara në pjesën veriore të Kosovës”, duke harruar me këtë rast, pjesëtarët e Policisë së Kosovës. Pikërisht këta paragrafë, sipas një pjese të shoqërisë civile dhe qytetarëve që kanë reaguar, lënë shumë për të dëshiruar.
“Nuk mundeni me reagu në këtë formë! Ose edhe po reaguat duhet të dënoni edhe sulmin ndaj Policisë së Kosovës e jo në njëfarë mënyre të reagoni me favorizim të njërës palë!” – e ka komentuar një qytetar deklaratën.
Një tjetër ka shkuar aq larg sa që ka thënë se ajo po i tingëllon “sikur ta kishte shkruar Vuçiqi”.
Për politikologun Albinot Maloku është e qartë se ku e ka burimin kriza në veri, prandaj, sipas tij, nuk mund të fajësohen në mënyrë të barabartë të gjitha palët.
“Situata në katër komunat ku janë të përqendruar qytetarët serbë të Kosovës, tanimë prej kohësh është mjaftë nevralgjike. Atje veç jeta normale nuk zhvillohet! Qytetarët në ato anë po manipulohen nga Beogradi zyrtar, andaj dëmtuese kryesore e normalitetit është Serbia me përqasjen e saj përmes presionit që të mos i lë qytetarët të jetojnë jetën normale, brenda kuadrit ligjor të vendit. Nuk janë assesi të barabartë bandat kriminale me ruajtësit e rendit dhe ligjit në pjesën veriore të Kosovës” – ka thënë ai për Fol Drejt.
Duke e komentuar këtë deklaratë, aktivisti Liridon Kurti për Fol Drejt ka thënë se, veç tjerash, kjo është skandaloze:
“Tentativa për të barazuar Institucionet e Republikës së Kosovës me bandat kriminale në Veri të Kosovës duke i emërtuar me një emër të përbashkët “palë” përveç që është skandaloze, është edhe hap drejt nxitjes së anarkisë në atë pjesë.”
Kurti, nga ana tjetër, bashkë me disa qytetarë të tjerë të Mitrovicës, kanë dënuar ashpër veprimet kriminale të bandave kriminale që veprojnë në veri, duke kërkuar asgjësimin e tyre:
“Të asgjësohen bandat kriminale në Veri për t’i lënë të lirë/a dhe të sigurt/a qytetarët/et e Republikës së Kosovës!
Dhuna e shkaktuar së fundmi nga bandat kriminale në Veri vë në pikëpyetje ndërtimin e një shoqërie të mirëfilltë politike.
Terrorizimi i qytetarëve/eve dhe bllokimi i lëvizjes së lirë kërcënon vlerat e përbashkëta që shteti i Kosovës i garanton për të gjithë, pa asnjë dallim etnik, fetar dhe kulturor. Te gjithë qytetarët/et e Republikës së Kosovës duhet t’i gëzojnë të drejtat që garantohen me Kushtetutë dhe me ligjet në fuqi. Vullneti dhe e ardhmja e tyre nuk duhet të diktohen nga grupet kriminale” – thuhet në këtë deklaratë, e cila është nënshkruar nga Besart Peci, Mevlude Skuroshi, Enis Emini, Genti Behramaj, Valent Ibishi, Qendresë Beqiri, Berna Ramaxhiku, Fatlum Sadiku, Liridon Kurti, Drilon Cena, Armela Hajra, Fehmi Ferati.
Me një reagim të përbashkët për situatën atje, kanë dalë edhe disa organizata të tjera. Ndryshe nga deklarata e CBM-së, këto organizata konsiderojnë se prapa veprimeve kriminale qëndrojnë grupet e dirigjuara nga Beogradi:
“Si organizata të shoqërisë civile dhe aktivistë të rajonit të Mitrovicës që kemi punuar dhe kontribuar për vite të tëra në proceset e pajtimit, promovimin e të drejtave të njeriut, ndërtimin e paqes, marrëdhënieve të mira ndëretnike si dhe për demokratizim, shprehim shqetësim të thellë në lidhje me situatën e krijuar në javët e fundit në rajonin ku ne veprojmë dhe jetojmë dhe që ndikon negativisht në progreset e bëra. Jemi në veçanti të stresuar dhe indijuar lidhur me sulmet fizike ndaj qytetarëve, gazetarëve dhe organeve të rendit, të ndodhura përgjatë muajit dhjetor 2022, në rajonin e Mitrovicës.
Përdorimi i dhunës, kërcënimet dhe justifikimet për bllokime të paligjshme të rrugëve dhe kërcënimet e qytetarëve nga grupet kriminale të organizuara dhe orkestruara nga qeveria e Beogradit, dëmtojnë paqen dhe krijojnë tensione ndëretnike në rajonin tonë.
Siguria, liria e lëvizjes dhe sundimi i ligjit është i garantuar për të gjithë qytetarët e Kosovës, andaj ftojmë organet e rendit, si dhe KFOR-in dhe EULEX-in që të veprojnë përkitazi me vendosjen e rendit dhe sigurisë.
Po ashtu, ftojmë të gjithë akterët relevant që të shmangin diskurset e dëmshme dhe që përshkallëzojnë gjendjen dhe sigurinë e qytetarëve, të veprojnë në mënyrë të menjëhershme drejt normalizimit të situatës në rajonin e Mitrovicës.”
CBM përkundër reagimeve, nuk ka dhenë ndonjë sqarim shtesë, në lidhje me deklaratën në fjalë./FolDrejt/
