Skandali financiar ku besohet se është përfshirë edhe ambasadori i Kosovës në Kroaci – Martin Berishaj, është rikthyer në vëmendjen e opinionit publik, shkruan Fol Drejt.
Emisioni Trça (Target), një ndër më të njohurit në zhanrin investigativ, i ka kushtuar një vëmendje të posaçme. Ndër të tjera bëhet e ditur se kompania GEN, është duke u hetuar tash e sa kohë nga hetuesia sllovene. Transaksionet e degës së GEN-it në Serbi, në kompanitë e ambasadorit Martin Berishaj, janë “pika e nxehtë” e hetimeve.
“Ka shumë pyetje të hapura pa përgjigje në këtë çështje. Tashmë është interesante se TV Sllovenia në Prishtinë po kërkonte një degë të Gen-I në adresën zyrtare, por atje nuk ka hasur në një të tillë” – konfirmon ekipi i gazetarëve hetues të Trça-s.
Emisioni e trajtoi skandalin nga disa perspektiva ndërsa të ftuar ishin Maks Helbl, kryetar i bordit të Gen-I, Zijad Beçiroviç, drejtor i IFIMES, lobisti Miloš Čirič dhe ish-drejtori i qeverisë për parandalimin e pastrimit të parave Klaudio Stroligo. Në emision ishte i ftuar edhe Kryeministri Robert Golob, i cili nuk mori pjesë në emision. Ai u drejtua nga Erika Žnidaršič.
Në emision u tha se “transaksionet e larta prej disa muajsh Robert Golob nuk i ka shpjeguar me të dhëna dhe dokumente, përkundrazi është përgjigjur me akuzat se janë sajesa për të larë hesapet me të dhe Gibanje Svoboda. Një dimension tjetër i çështjes është politik dhe ndërkombëtar. Informacionet nga organet e huaja hetimore u bënë publike pak para zgjedhjeve tona parlamentare dhe nuk janë të paktë ata që janë të bindur për keqpërdorimin e institucioneve zyrtare për marrjen e informacioneve kundër kundërshtarëve politikë.”
Në këtë pikë, historia bëhet më interesante. Një ekip i Tarças kishte udhëtuar për në Prishtinë për të kërkuar selinë zyrtare të kompanisë së GEN-I në Kosovë, por “aty ku duhej të ishte zyra e degës, ekipi gjeti një fotokopje.
“GEN-I nuk është këtu, nuk ndodhet këtu!” – citohet të ketë thënë pronari i fotokopjes.
“Më pak se një kilometër është ndërtesa dhe adresa ku është regjistruar në Prishtinë kompania e Martin Berishajt, sot ambasadori i Kosovës në Zagreb, i cili ka edhe nënshtetësi sllovene, ku njihet me shumë qarqe politike sllovene. Kompania e tij MB Consulting, pak para zgjedhjeve parlamentare të vitit të kaluar, pas publikimit të listave të transaksioneve, u gjend në qendër të skandalit për shkak të transfertave miliona dollarëshe të sistemit të biznesit Gen-I, në kohën kur ai drejtohej nga kryeministri aktual Robert Golob” – zbulojnë më tej të gjeturat e Trça-s.
Për më shumë zbulohet se transferimet te Berisha nuk kanë ardhur nga dega e Kosovës së GEN-it, e cila gjithsesi nuk mund të gjendet në adresën zyrtare, por nga Serbia. Më saktësisht, nga kompania Gen-I Beograd me katër punëtorë, e cila çdo vit regjistron qindra milionë euro dhe e cila nuk ka shenjën e saj në objektin ku ndodhet selia.
Më 14 janar 2015, Berishaj themeloi kompaninë MB Consulting në Kosovë. Më pak se një muaj më vonë, më 11 shkurt 2015, paratë vijnë nga Beogradi për herë të parë. Gen-I transferon 66500 euro të majme në kompaninë e sapohapur, në të cilën është i punësuar vetëm Berishaj. Dy ditë pas kësaj, Berishaj tërheq 50 mijë nga llogaria.
Brenda një muaji, një tjetër fluks nga Beogradi mbi shtatë mijë euro. Berishaj tërheq pak më pak se tre mijë të nesërmen e transferimit. Në prill 2015, përsëri një transfertë më e madhe: 22 mijë. Tërheqje 18 mijë në pak ditë. Dhe kështu me radhë. Transferim – tërheqje, transferim – tërheqje. Një shembull tjetër: transferimi në shkurt 2016 arriti në 92 mijë euro.
Nga listat e analizuara të transaksioneve del se Gen-I Beograd vetëm kompanisë kosovare MB Consulting i ka transferuar gjithsej 1.5 milionë euro. Sipas analizës së Tarçës, nga llogaria e kompanisë së Berishës janë tërhequr rreth 1.2 milionë euro cash.
Kjo nuk ishte kompania e vetme Berisa të cilës Gen-I nga Serbia i ka transferuar para. Mes viteve 2019 dhe 2020 – kur remitancat nga Beogradi në kompaninë kosovare u ulën – sipas tabelave të publikuara në media, paratë kanë rrjedhur në një masë më të madhe në kompaninë malazeze të Berishës me të njëjtin emër, MB Consulting. Transfertat bëheshin çdo muaj, për gati dy vjet, dhe më shumë se 50 mijë euro në muaj. Sipas dokumenteve, në vitin 2019 dhe 2020 janë arkëtuar gjithsej 566 mijë euro transferta nga dega serbe e Gen-I.
Siç shkruan autoritetet financiare serbe në tabelat e publikuara, Berishaj thuhet se do të tërheqë shuma të mëdha parash edhe nga dega malazeze. Nga dokumenti shihet se ai ka tërhequr në mënyra të ndryshme deri në 596 mijë euro. Deri më sot askush nuk i ka mohuar transaksionet milionëshe të publikuara, as Berishaj dhe as paguesi, pra grupi Gen-I. Tërheqja e sasive të mëdha të parave, megjithatë, ka ndezur spekulime për pastrim parash.
“U raportua, por nuk u konfirmua, se një pjesë të parave i ktheu në Slloveni, ku i dërguan në bursa të ndryshme ndërkombëtare për t’i humbur gjurmët. Berishaj luante rolin e bartësit. Pjesa tjetër e parave mbeti në Kosovë, ku i financoi fushatat e dy partive politike. Këto janë dy partitë që kanë të gjithë pushtetin në Kosovë”, tha Lirim Mehmetaj, redaktor i mediave private kritike ndaj autoriteteve të Kosovës, Posta Shqiptare, e cila është marrë me rasti i transferimeve të Gen-I te Berisha për gati një vit.
“Ai nuk i mohoi transaksionet. Ai tha se ishte paguar për konsulencë. Kjo është e pazakontë sepse Gen-I është në biznesin e energjisë elektrike dhe Berishaj është profesor i shkencave politike. Kur e pyetëm për këtë, ai nuk kishte përgjigje. Ai gjithashtu nuk ka treguar se ku i ka dërguar paratë që ka tërhequr dhe si i ka shpenzuar”, shtoi Mehmetaj.
Ua kujtojmë se akuzat Berishaj i kishte mohuar fillimisht në mënyrë kategorike, duke i cilësuar si spekulime mediale pretendimet e lidhjeve të tij me Robert Golob:
“Kryeministrin e Republikës së Sllovenisë, z. Robert Golob nuk e njoh, kurre nuk e kam takuar në jetën time dhe nuk kam qenë kurrë në kontakt me të, kështu që pavarësisht asaj se sa herë do ta ricikloni lajmin e rrejshëm, ai vetem lajm i rrejshëm mbetet!”
Vetë Kryeministri Albin Kurti pat deklaruar se shpresonte që drejtësia sllovene ta thoshte fjalën e saj, duke besuar se Berishaj do të dilte i pastër nga ky proces.
Por dje u bë e ditur se raportimet e Planet TV për përfshirjen e ambasadorit Martin Berishajt në skandalin e madh financiar, të cilat ishin dërguar në gjykatë për shpifje nga Berishaj, janë refuzuar nga shkalla e dytë e Gjykatës Sllovene.
Kryeredaktori i Planet TV Mirko Mayer i cili e bëri publik vendimin, ia kujtoi Kryeministrit Kurti se dëshira e tij i është plotësuar:
“Kam dëgjuar se kryeministri i Kosovës, Albin Kurti ka bërë një deklaratë dhe ka shprehur dëshirën që drejtësia do të thotë fjalën e saj në rastin e Berishajt kundër Planet TV. E njoftoi se kjo dëshirë i është plotësuar dhe drejtësia tashmë ka vendosur. Rasti i hapur nga Berishaj është refuzuar nga gjykatë në shkallën e dytë”, ka shkruar Mayer.
Slišim, da je kosovski premier @albinkurti podal izjavo za @NovicaMihajlo @Delo in pri tem izrazil upanje, da bo v primeru Berishaj proti @PlanetTV zadoščeno pravici.
➡️Sporočam, da se mu je želja že izpolnila: 16.2. Berishajevo kazensko tožbo zavrglo še sodišče druge stopnje. 👇 pic.twitter.com/bhTDK15YZp— Mirko Mayer 🎬 📺 (@Mirko_Mayer) February 23, 2023
Deri më tani, nuk ka pasur ndonjë reagim për zhvillimet e fundit rreth rastit Berishaj, as nga Qeveria e Kosovës, e as nga Ministria e Punëve të Jashtme./FolDrejt/
