Ne nuk e shohim planetin Tokë çdo ditë nga hapësira, kështu që fotot e marra nga kamerat e anijeve kozmike janë gjithmonë mjaft spektakolare, shkruan Klix, përcjell Fol Drejt.
Sonda Juice e lëshuar së fundmi dërgoi disa foto të mrekullueshme të Tokës menjëherë pasi u nis në udhëtimin e saj tetë-vjeçar drejt Jupiterit.
Fotot e para janë realizuar pak pas nisjes më 14 prill dhe bëhet fjalë për një mision të quajtur Jupiter Icy Moons Explore të udhëhequr nga Agjencia Evropiane e Hapësirës (ESA). Anija kozmike u nis duke përdorur një raketë Ariane 5 nga Porti Hapësinor Evropian në Guajanën Franceze.
Një nga fotot e para tregon momentin kur grupi diellor i anijes hapet në hapësirën e errët. Të gjitha fotot janë përpunuar lehtë për t’i bërë ato më tërheqëse për t’u parë dhe janë krijuar për të testuar kamerat e sondës, të cilat nxjerrin foto me rezolucion 1024 x 1024 piksele. Këto kamera janë të pajisura posaçërisht për të regjistruar fazat e ndryshme të zhvillimit të këtij misioni historik dhe do të jenë funksionale gjatë fluturimit të Hënës, Tokës dhe Venusit.
Ndërsa njëra kamerë është e montuar në pjesën e përparme të anijes, tjetra është në anën e sipërme dhe në ditët në vijim do të regjistrojë zbulimin e antenës së radarit të sondës, e cila përdoret për të eksploruar hënat e akullta. Kjo antenë është 16 metra e gjatë. Meqë ra fjala, këto antena radari janë krijuar për të depërtuar dhe eksploruar atë që ndodhet nën sipërfaqen e akullt të hënës. Sa i përket kamerave të përmendura, ato përdoren vetëm për monitorim, ndërsa ato shkencore më të sofistikuara janë krijuar për të kapur foto me rezolucion të lartë dhe do të përdoren për të fotografuar Jupiterin dhe hënat e tij në vitin 2031.
Qëllimi i misionit Juice është të eksplorojë dhe studiojë tre hënat e Jupiterit, përkatësisht Europa, Ganymede dhe Callisto.
“Juice do të monitorojë mjedisin kompleks magnetik, rrezatues dhe plazmatik të Jupiterit dhe ndërveprimin e tij me hënat, duke studiuar sistemin e Jupiterit si një arketip për sistemet gjigante të gazit në të gjithë universin,” tha ESA.
Anija kozmike është e pajisur me mjete të specializuara si sensorë në distancë, gjeofizikë dhe instrumente të tjera.
Komuniteti shkencor është i emocionuar për misionin Juice dhe do të jetë interesante të shihet se çfarë lloj fotosh dhe zbulimesh do të ofrojë ky mision në muajt dhe vitet e ardhshme. /FolDrejt/
