Më 9 qershor 1999, u nënshkrua marrëveshja ushtarako-teknike e Kumanovës, e cila pati për pasojë kapitullimin e Millosheviqit dhe përfundimin e Luftës së Kosovës
Sot janë bërë 23 vjet nga humbja e Serbisë transmeton Fol Drejt.
Në Luftën e fundit në Kosovë janë vrarë mbi 10 mijë njerëz, rreth 5 mijë të tjerë janë zhdukur dhe mbi 1 milion shqiptarë janë zhvendosur. Shkatërrimet materiale po ashtu kanë qenë masive.
Me nënshkrimin e marrëveshjes së Kumanovës, Serbia është detyruar të tërheqë të gjitha forcat e saj policore dhe ushtarake nga Kosova. Marrëveshja e Kumanovës, ndërmjet NATO-s dhe RFJ-së, e nënshkruar më 9 qershor 1999, hyri në fuqi më 11 qershor 1999. Atë e nënshkruan Michael Jackson, komandanti i parë i KFOR-it në Kosovë, dhe ish-shefi i Shtabit të Armatës serbe, gjenerali Nebojsha Pavkoviq, i akuzuari i Hagës për krime lufte dhe gjenocid.
Marrëveshja e Kumanovës shënon njëkohësisht edhe përfundimin e bombardimeve të NATO-s mbi caqet serbe, të cilat kishin vazhduar për 78 ditë me radhë. Midis tjerash për realizimin e kësaj marrëveshjeje u angazhuan e bën përpjekje të ndryshme diplomatike.
Ndër të tjera në marrëveshje parashihej:
- c) që nga Kosova të largohen të gjithë personat dhe organizatat me aftësi militare duke përfshirë armatën e rregullt dhe forcat e marinës, civilë të armatosur, paramilitarë, forcat ajrore, garda kombëtare, policia kufitare, rezervistët, policia ushtarake, shërbimet informative, MUP-it, policia lokale, speciale, antirebeliste, antiterroriste dhe çdo grup i përcaktuar kështu nga KFOR-i.
- d) u caktua një zonë sigurie ajrore 25 kilometra përtej kufirit të Kosovës
- e) u caktua një zonë 5 kilometrash përtej kufirit me RFJ-në që nuk guxonte të vendosen armatimet e rënda dhe ushtria, përveç ushtarët kufitarë.
Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.
Sekretari i përgjithshëm i NATO-së, Havijer Solana, më 10 qershor 1999 kishte lëshuar urdhrin për ndalimin e bombardimit dhe Këshilli i Sigurisë së OKB-së miratoi rezolutën 1244, ku u dërguan 37.200 ushtarë të KFOR-it nga 36 shtete.
Misioni ishte i ndarë në pesë zona të përgjegjësisë, që i përkisnin KFOR-it amerikan, anglez, francez, gjerman dhe italian.
Me hyrjen e NATO-s, në Kosovë ka nisur edhe vendosja e misionit të përkohshëm të Organizatës së Kombeve të Bashkuara, i cili do të administronte vendin për një periudhë të caktuar kohore.
Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës. /FolDrejt/
