Sot, rreth orës 11 pritet të zgjidhet qeveria e re Kurti, e cila do ketë 15 ministri, edhepse në fillim mendohej të ishte me 12 ministri.
Ndryshe Lëvizja Vetëvendosje dhe Lidhja Demokratike e Kosovës arritën që dje të zyrtarizojnë koalicionin e tyre bashkëqeverisës pas përpjekjeve disa mujore.
Kuvendit të Kosovës do t’i shtohen emra të rinj të deputetëve nga të dy partitë, për shkak të ndryshimeve që do të bëhen nëpër poste ekzekutive.
Përbërja e qeverisë së re
Glauk Konjufca i cili aktualisht mban pozitën e kryetarit të Kuvendit pritet që të japë dorëheqje dhe të emërohet ministër i Punëve të Jashtme.
Nga VV, ministra do të jenë edhe Albulena Haxhiu që do të drejtojë Ministrinë e Drejtësisë, pastaj Besnik Bislimi i cili do të udhëheqë me Ministrinë e Financave, Rozeta Hajdari pritet të emërohet ministre e Ekonomisë, Arben Vitia do të jetë ministër i Shëndetësisë ndërsa Blerim Reka do të jetë ministër i Integrimeve Evropiane.
Lidhja Demokratike e Kosovës do të udhëheqë me 6 ministri, ku Agim Veliu pritet të jetë në krye të Ministrisë së Punëve të Brendshme. Lumir Abdixhiku do të jetë ministër i Infrastrukturës, Besian Mustafa pritet t’i besohet Ministria e Bujqësisë, Hykmete Bajrami do të udhëheqë me Ministrinë e Arsimit, Vlora Durmoshi me atë të Kulturës, ndërsa Ministria e Mbrojtjes do të udhëhiqet nga Anton Quni.
Qeveria do të ketë dy zëvendëskryeministra, i pari do të jenë Avdullah Hoti i LDK-së ndërsa i dyti Haki Abazi i VV-së.
Vjosa Osmani pritet të votohet si kryeparlamentare, ndërsa tri ministri do t’i takojnë minoriteteve.
