Ministri i Emigracionit, Jose Luis Escriva, tha se sipas reformës Spanja do t’u lejojë të huajve që jetojnë në vend për më shumë se dy vjet të kenë qasje në trajnime në lidhje me profesionet e kërkuara.
Qeveria spanjolle ka miratuar një reformë gjithëpërfshirëse në ligjet e saj të imigracionit për të lehtësuar punën për të huajt në Spanjë, shkruan AA, transmeton Fol Drejt.
Megjithëse Spanja ka një nga normat më të larta të papunësisë në Bashkimin Evropian (BE), përkatësisht rreth 13 për qind, vendi synon të mbulojë vendet e lira të punës dhe të rregullojë situatën e punës së emigrantëve që tashmë jetojnë këtu.
Ministri i Emigracionit, Jose Luis Escriva, tha se sipas reformës Spanja do t’u lejojë të huajve që jetojnë në vend për më shumë se dy vjet të kenë qasje në trajnime në lidhje me profesionet e kërkuara, që do të vepronin si një “urë” për tregun ligjor të punës në vend.
Në Spanjë pjesa më e madhe e vendeve të paplotësuara të punës është në sektorët e bujqësisë dhe shërbimeve.
Reforma po ashtu do të lejojë të punojnë rreth 50 mijë studentë të huaj që studiojnë në Spanjë dhe do ta bëjë më të lehtë për ta qasjen në tregun e punës pasi të kenë përfunduar studimet.
Reformat do të zbatohen edhe për punëtorët emigrantë sezonal dhe do ta bëjnë më të lehtë regjistrimin e të huajve si punëtorë të vetëpunësuar.
Ndërkohë, reforma do ta bëjë më të lehtë për punëdhënësit punësimin e të huajve dhe synon t’i përshpejtojë dhe thjeshtojë të gjitha proceset e emigracionit.
Në përgjithësi, sipas ministrit Escriva, qëllimi i Spanjës me reformën është të “promovojë migrimin legal, të sigurt dhe të organizuar”.
Në vitin 2022, mbi 15 mijë emigrantë kanë mbërritur në Spanjë përmes shtigjeve të parregullta të emigrimit nga toka apo deti. Të paktën 9.300 prej tyre mbërritën përmes rrugës së rrezikshme të ishujve Kanarie, e cila këtë vit ka marrë jetën e qindra njerëzve.
Sipas të përditshmes spanjolle ‘El Pais’, reforma e emigracionit u miratua pavarësisht kundërshtimeve nga Ministria e Punëve të Brendshme e Spanjës, e cila pretendoi se ndryshimet do të nxisin emigracionin e paligjshëm.
Reforma me detaje të mëtejshme sot më vonë do të publikohet në gazetën zyrtare të Spanjës dhe do të hyjë në fuqi 20 ditë pas publikimit./FolDrejt/
