Qeveria rajonale e Katalonjës në verilindje të Spanjës shpalli emergjencë thatësire në 24 komuna, ndërsa do të fillojë të vendosë kufizime të rëndësishme për përdorimin e ujit gjatë javës së ardhshme, raporton Anadolu, transmeton Fol Drejt.
Kjo është hera e parë që rajoni ka ngritur një nivel të lartë alarmi për thatësirën në zonë. Protokolli i emergjencës vjen pasi kohët e fundit Spanja miratoi planin për t’u marrë me mungesën e reshjeve.
Komunat në provincën verilindore të Girona po marrin ujë nga ujëmbajtësit me nivelet më të ulëta ndonjëherë dhe janë gjithashtu rajonet më të goditura.
Në dy qytete të tjera në jug të Barcelonës, është shpallur gjendja e jashtëzakonshme, sepse ujin e marrin nga rezervuarët, kapaciteti i të cilëve është vetëm gjashtë për qind i mbushur.
Qytetet duhet të kufizojnë konsumin e ujit në 200 litra për frymë në ditë. Edhe pse kishte kufizime të lehta në të njëjtën zonë, agjencia katalanase e ujit njoftoi se konsumi u rrit në korrik në 243 litra. Megjithatë, regjimi i ri do të penalizojë qytetet që tejkalojnë konsumin maksimal të ujit.
Rreth gjashtë milionë njerëz në Katalonjë janë nën kufizime të buta të ujit për muaj të tërë. Një nga pasojat më të dukshme të kufizimeve është tharja e parqeve dhe kopshteve në qytete si Barcelona, sepse nuk lejohet të ujiten zona të gjelbra.
Qytetet dhe banorët në zonën e prekur jo vetëm që do të duhet të ndalojnë ujitjen e bimëve, por do të ulin konsumin për frymë, do të ulin konsumin e ujit industrial me 25 për qind dhe do të ndalojnë ujitjen e të mbjellave tërësisht.
Samuel Reyes, drejtor i Agjencisë Katalanase të Ujit (ACA), u bëri thirrje qytetarëve të reduktojnë përdorimin e tyre të ujit, por tha se nuk duhet të shqetësohen për ndërprerjen. Ndërprerjet e ujit, tha ai, ishin shpesh kundërproduktive, pasi banorët filluan të mbushnin vaska ose të grumbullonin ujë sapo vinte uji. Në vend të kësaj, ai i inkurajoi qytetarët të instalonin pajisje që reduktojnë presionin e ujit.
