“Stenta 1”, eksperti financiar thotë se shumat që janë lejuar nga ish-ministri Agani janë në harmoni me vendimet e bordit ekzekutiv

Eksperti financiar, Emin Blakaj ka thënë se shumat të cilat janë lejuar nga sekretari i Ministrisë së Shëndetësisë (MSH) dhe ministri, janë në harmoni të plotë me vendimin e bordit ekzekutiv.

Këtë deklarim, eksperti Blakaj e ka dhënë në seancën e së premtes, në rastin e njohur si “Stenta 1”, ku ish- ministri i Shëndetësisë Ferid Agani dhe ish-sekretari i kësaj ministrisë, Gani Shabani po akuzohen për korrupsion, raporton “Betimi për Drejtësi”.

I pyetur nëse ka pasur tejkalim të shumës së mjeteve financiare me ato që janë caktuar në vendimet e bordit të Ministrisë së Shëndetësisë, eksperti Blakaj ka thënë se këto shuma kanë qenë në harmoni të plotë me vendimet e bordit.

Paraprakisht, eksperti i është përgjigjur pyetjeve të parashtruara nga prokurorja Florije Shamolli, duke deklaruar se gjatë përpilimit të ekspertizës nuk ka qenë materiali i mjaftueshëm, andaj ka kërkuar material shtesë edhe nga Ministria e Shëndetësisë.

Sipas tij, kanë munguar disa transfere që janë bërë për pacientët që janë trajtuar jashtë institucioneve publike

Kurse, lidhur me atë se si ka ardhë deri te vlerësimi i dëmit të përcaktuar në ekspertizë, i njëjti ka thënë se ajo vlerë ka dalë si rezultat që pacientët nuk i kanë pasur dokumentet që i përkasin kategorisë për pagesë 100%, e që është dashur të paguhen në vlerën 70%.

Në vazhdim, duke u përgjigjur në pyetjet e avokatit Vokshi, eksperti Blakaj ka sqaruar se i është drejtuar me shkresë MSH-së për t’ia siguruar raportet e auditimit për periudhën në të cilën akuzohen të akuzuarit por që sipas tij, në përgjigjen e MSH-së është deklaruar se nuk kanë raporte të auditimit për periudhën që e ka kërkuar i njëjti.

“Ata na kanë dërguar vetëm buxhetin e aprovuar nga Kuvendi i Kosovës, por jo edhe raportet e auditimit”, shtoi ai.

Në pyetjet e mbrojtësit të të akuzuarit Agani, avokatit Adem Vokshi nëse në tabelat si në ekspertizë ka ndryshuar ministri në këto raste vendimin e bordit ekzekutiv, eksperti Blakaj tha se për këtë nuk ka informacion, por që në dokumentet që i ka nënshtruar ministri, ai është thirrur në shumat të cilat i ka aprovuar bordi ekzekutiv.

Eksperti Blakaj në deklarimin e tij ka thënë se të gjitha pagesat janë ekzekutuar nga kodi ekonomik 21200 që është me përshkrimin “subvencione për etnitete jo publike” dhe se pagesat janë realizuar nga ky kod.

Tutje, avokati Vokshi me lejen e gjykatës i ka ofruar ekspertit në shiqim shkresën e 12 qershorit 2015, e nënshkruar nga sekretari Gani Shabani dhe ministri Imet Rrahmani dhe një kopje të librezës së veteranit për pacientin H.U, e që lidhur me këtë pacient, eksperti tha se meqë i njëjti ka qenë pjesë e listës që është dashur të bëhet verifikimi, ka konstatuar se edhe për të është bërë pagesë jashtë normës 70% të lejuar.

“Ndërsa, sa i përket librezës së veteranit, nuk e kam pasur në dosje të lëndës. Unë nuk kam pasur CD, por vetëm dosje fizike”, shtoi ai.

“Janë gjithsej 17 pacientë, 14 pacientë kanë pasur dokumente që vërtetojnë një gjë të tillë, kurse 3 prej tyre nuk kanë pas, për këtë arsye e kemi pasqyruar në listë si tejkalim të normës së subvencionimit”, tha eksperti Blakaj.

Përgjigjen e njëjtë, eksperti e dha edhe për pacienten H.Gj, duke shtuar se nëse ka dëshmi që vërtetojnë se pacientët e tillë i përkasin kategorisë invalid, veteran apo rast social, vlerat financiare në ekspertizë do të ndryshojnë.

Kurse, i akuzuari Ferid Agani ka pasur vërejtje në ekspertizë, duke thënë që detyrë e ekspertit ka qenë të konstatojë nëse ka pasur tejkalim të shumave të vendimeve të bordit ekzekutiv nga ana e MSH-së, andaj shtroi pyetjen se çfarë kuptimi kanë diskutimet për vende të veçanta.

Ndërkaq, mbrojtësi i të akuzuarit Shabani, avokati Skender Musa fillimisht i ka dorëzuar gjykatës, prokurorisë dhe ekspertit një dosje me prova për të vazhduar me pyetje drejtuar ekspertit financiar.

Në pyetjen se për pacientët e paraqitur si në ekspertizë nga numri 1 deri 38, a ka pasur dokumentacion se çfarë statusi kanë, ai e pohoi një gjë të tillë, me arsyetimin se në dosje fizike nuk ka pasur dëshmi të tilla.

Eksperti Blakaj e kishte të njëjtën përgjigje edhe lidhur me atë nëse sekretari Shabani ka ndryshuar vendimet e bordit dhe ka rritur shumat, duke thënë se i njëjti është thirrur në vendim të bordit dhe nuk ka pasur tejkalim të shumave.

Kurse, lidhur me atë se a është në dijeni se nga 38 raste të specifikuara në ekspertizë, 31 prej tyre ishin raste urgjente, eksperti Blakaj ka thënë se nuk e di numrin e saktë por që edhe rasteve urgjente sipas tij, udhëzimi nuk i jep të drejtën të kalojë normën 70%.

 

Ai thotë nuk kishte parë nëse ka dosje që nuk është nënshkruar nga sekretari Shabani, por që avokati Musa iu drejtua se “në provat që i dorëzova sot keni 9 raste në të cilat nuk janë të nënshkruara nga Gani Shabani”.

Po ashtu, eksperti tha se në dosje nuk ka pasur prova që vërtetojnë të kundërtën, në rastet e përmendura nga avokati Musa se në tabelën 7, eksperti ka regjistruar 25 raste që ka tejkalim të shumave me vërtetim të MPMS, që marrin ndihma sociale, 6 invalidë të luftës, 2 veteranë, 1 anëtar i shoqatës së verbërve, 1 i paraburgosur, 1 trajtim në Gjermani dhe me fletëgarancion 28 raste.

 

I njëjti është pyetur se në të njëjtën tabelë, meqë në numrin rendor 4 dhe 8 paraqitet emri A.R, me shumë të aprovuar njësoj dhe datë të njëjtë, a bëhet fjalë për të njëjtin person dhe a ka qenë një apo dy pagesa.

Për këtë, eksperti Blakaj ka thënë ky rast duhet të verifikohet edhe njëherë nëse është fjala për të njëjtin pacient sepse sipas tij, numri i protokollit ndryshon.

“Është 1 nga 23 nënshkrime. E nga dosja e dorëzuar, janë 47% raste të panënshkruara nga unë”, shtoi ai.

Ky propozim u mbështet nga avokati Vokshi dhe nuk u kundërshtuar nga prokurorja Shamolli, kurse u aprovua nga trupi gjykues i udhëhequr nga gjykatësi Kujtim Krasniqi.