Sekretari i Përgjithshëm i NATO-s Jens Stoltenberg tha të mërkurën se Rusia nuk duhet nënvlerësuar dhe se Ukraina ka nevojë për furnizim të menjëhershëm ushtarak, shkruan Anadolu Agency, përcjell Fol Drejt.
Duke folur për gazetarët gjatë rrugës për në takimin jozyrtar të ministrave të mbrojtjes të BE-së në Stokholm të Suedisë, Stoltenberg tha se nuk mund të përjashtohet që qyteti lindor i Ukrainës, Bakhmut “mund të bjerë përfundimisht në ditët në vijim”.
Megjithatë, ai tha se kjo nuk “do të pasqyrojë domosdoshmërisht ndonjë pikë kthese të luftës”.
“Kjo thjesht thekson se ne nuk duhet të nënvlerësojmë Rusinë,” theksoi ai, duke u kërkuar vendeve të NATO-s dhe BE-së që të vazhdojnë të furnizojnë Ukrainën me ndihmë ushtarake.
Stoltenberg dhe ministrat e mbrojtjes të BE-së do të diskutojnë planet për rritjen e prodhimit të industrisë evropiane të mbrojtjes.
“Shkalla aktuale e konsumit në krahasim me shkallën aktuale të prodhimit të municioneve nuk është e qëndrueshme,” tha ai.
Përveç “hapave të rëndësishëm” të ndërmarrë tashmë nga NATO, “ne duhet të bëjmë më shumë sepse duhet të sigurojmë që Ukraina të marrë nevojat e saj për t’u mbrojtur kundër agresionit të luftës së Rusisë dhe ne duhet të rimbushim rezervat tona,” shtoi ai. /FolDrejt/
